Претседателот на Реал Мадрид, Флорентино Перез увиде дека неактивноста во летниот преоден рок беше грешка и затоа планира да биде активен во наредните два, но притоа мора да ја подголтне гордоста.

Во светот на фудбалот, доминираат четири најголеми агенти, а Перез е добар само со еден. Претседателот на „кралскиот“ клуб е во одлични односи само со најмоќниот агент, Жорге Мендеш, но проблемот е што фудбалерите за кои е заинтересиран се клиенти на останатите тројца агенти.

Тој се надеваше дека Пини Захави ќе успее да издејствува трансфер на Роберт Левандовски од Баерн Минхен, но од тоа нема ништо и најдобриот класичен напаѓач на светот потпиша нов договор со европскиот шампион. Првиот човек на „кралевите“ ќе се обиде да го убеди Захави дека најдобро место за друг негов клиент, Давид Алаба исто така од Баерн, е токму „Сантијаго Бернабеу“.

Добро е познато дека Перез не го поднесува Мино Рајола и одбива да соработува со него, но доколку сака да го задржи Зинедин Зидан на клупата ќе мора да му ја исполни најголемата желба, Пол Погба. Проблемот е што за кариерата на Погба се грижи токму Рајола. Главоболките на Перез се зголемуваат и поради неговата втора голема желба, Ерлинг Халанд од Борусија Дортмунд. Халанд е означен како главна мета за летниот преоден рок, но проблем за Перез е што Рајола се грижи за кариерата на одличниот Норвежанец па поради тоа ќе мора да ја голтне гордоста и да се обиде прво да го донесе Погба, за потоа да се фокусира на Халанд. Проблемот со Рајола е што тој бара премногу големи провизии од трансферите, а тоа Перез не сака да му го исполни. Познато е дека при 105 милиони евра вредниот трансфер на Погба од Јувентус во Манчестер јунајтед, Мино Рајола наместо вообичаени 10-15 проценти, зема дури 25 проценти провизија.

Последниот проблем за Флорентино Перез се вика Џонатан Барнет. Ситуацијата со статусот на Герет Бејл во Реал Мадрид прерасна во вистинска сапуница изминаните неколку години, Барнет постојано ги обвинуваше Перез, Зидан и Реал Мадрид за понижувачкиот однос кон неговиот клиент што минатото лето резултира со враќање на Велшанецот во Тотенхем.
Сега, Перез е заинтересиран за тинејџерската сензација Едуардо Камавинга од Рен кој во јануари може да се најде на трансфер листата. Проблемот за Перез е што негов агент е токму Џонатан Барнет и поради лесно може да се случи Камавинга наместо во Реал Мадрид да заврши во некоја друга екипа.