EСПН, кој е во сопственост на компанијата „Волт Дизни“, постигна историски договор со Американската национална фудбалска лига (НФЛ) за стекнување на НФЛ мрежата и други медиумски средства на лигата. За возврат, НФЛ ќе добие 10 проценти сопственички удел во EСПН. Договорот, кој сè уште чека регулаторно одобрување, ќе му овозможи на EСПН дополнително да ја зајакне својата понуда на содржини на својата претстојна платформа за стриминг. Точната вредност на трансакцијата не беше прецизирана, но аналитичарите проценуваат дека уделот на НФЛ во EСПН вреди помеѓу 2 и 3 милијарди долари, објави Ројтерс, пренесува Каматица.

– Тешко е точно да се процени вредноста, но секако е неколку милијарди – рече аналитичарот за спортски маркетинг Боб Дорфман од Сан Франциско. Покрај НФЛ Нетворк, EСПН ќе ја купи и дигиталната платформа НФЛ Фантази, како и правата за дистрибуција на каналот НФЛ РедЗоун до своите кабелски и сателитски клиенти. Според новиот договор, EСПН ќе има сопственост и оперативна контрола врз ТВ и стриминг правата за НФЛ Нетворк, која ќе продолжи да емитува седум натпревари годишно.