Кафеанџиите на Кејот зад ГТЦ со своето самоволно однесување годинава започнаа многу порано отколку минатата година, па уште на првите сончеви денови ги распослаа масите и ги сместија гостите на просторот надвор од застаклените тераси. И ако лани ова се случуваше среде лето, кога општинските и градските инспектори имаа полни раце работа во обид да ја запрат узурпацијата на јавниот простор на шеталиштето на Кеј, годинава се чини и тие се сѐ уште „подзаспани“.

До овој момент нема информација дали инспекторите излегле на терен, дали започнале да казнуваат или не и како планираат да излезат на крај со непослушните сопственици на угостителските објекти од кои дел ниту казните не ги спречија минатата година да ги повлечат масите во застаклениот дел, каде што им е дозволено да ги поставуваат.

Кејот „13 Ноември“ до пред четири години личеше на „панаѓур“, со импровизирани летни тераси поставени по целата ширина на шеталиштето, поради што на луѓето што сакаа само да прошетаат на овој простор без да седнат во кафулињата, не им беше многу пријатно.

Ред во хаосот реши да направи претходниот градоначалник на Скопје, Петре Шилегов, кој најави дека ќе се уреди кејот, а летните тераси ќе се „приберат“ пред угостителските објекти. Така и се случи и покрај големиот отпор и негодување од угостителите.

Кејот 13 Ноември е еден од најатрактивните јавни простори во нашиот град, кој е сериозно девастиран како простор во кој владее целосен хаос и безредие. Немам намера тоа да го дозволам туку на скопјани ќе им дадам еден репрезентативен јавен простор по светски стандарди. Градот нема да биде заложник на неколку локали, од кои три се на еден човек. Разговарам со бизнис заедницата да се најде оптимално решение, но компромис околу слободен јавен простор и репрезентативност на кејот не може да биде правен на штета на граѓаните – рече Шилегов пред почетокот на реконструкцијата на кејот.

Како компромисно решение за да им се удоволи и на нивните барања, при реконструкцијата добија проширување на терасите за дополнителни 3,5 метри. Летните тераси набргу станаа „зимски“ затоа што сопствениците ги застаклија за да можат да се користат во текот на целата година, па сега им недостасува отворен простор за летно време.

Но, тоа што им недостасува на кафеанџиите не треба да е на штета на скопјани, а она што се случува на Кејот, го покажува токму тоа. Масите и столовите за услужување гости се поставени во два реда до клупите на шеталиштето, што значи дека клупите повеќе не можат да ги користат граѓаните затоа што ќе се чувствуваат како да седнале во кафуле.

Инспекциите на терен: Кафеанџиите добија казни, но не ги тргнаа масите и столовите од кејот

Одобренија за поставување урбана опрема на кејот и на плоштадот Македонија издава Град Скопје, а инспекциски надзор вршат инспекторите на Општина Центар и на Град Скопје. Дали кафулињата побарале и добиле дозвола од Градот – не е познато. Од Општината и од Градот не одговорија досега ниту како ќе постапат и дали испратиле инспектори на терен.

Инаку, казната за поставување урбана опрема без одобрение се движи од 1.000 до 1.500 евра за правното лице и 300 евра за одговорното лице.