Добивал закани, должел 2.7 милиони евра и позајмувал пари од соиграчи, емотивна исповед на Фаџоли
Италијанскиот фудбалер и член на Јувентус, Николо Фаџоли сериозно си ја загрози кариерата со коцкањето и обложувањето на фудбалски натпревари.
Препорачано
Фаџоли е првиот на кого и официјално му беше изречена суспензија, па така Италијанецот нема да може да игра фудбал во наредните седум месеци, додека пет ќе бидат заменети со парични казни. Исто така Фаџоли ќе мора да посетува установи за одвикнување од коцкање.
На сослушувањето пред полицијата фудбалерот признал дека станал зависен, а неговиот долг достигнал и до 2.7 милиони евра.
„Најлошиот период ми беше помеѓу март и април 2023 година. Тогаш на натпреварот против Сасуоло бев заменет откако направив серија грешки На клупата плачев, но не поради измената туку поради долговите. Во септември 2022 долгот ми беше 250.000 евра, потоа се зголеми на 2.7 милиони евра. Прво се обложував на тенис и онлајн казино, потоа и на фудбал, но никогаш на натпреварите на Кремонезе и Јувентус, дури ниту за прекршоци, картони или стрелци“.
„Имаше момент кога повеќе не можев да подигнувам пари од мојата банкарска сметка која ја контролираше мајка ми, па почнав да барам пари од пријатели. На Гати и Драгусин им должам 40.000 евра. Им кажав дека сакам да одам да купам Ролекс од златарница во Милано, меѓутоа со тие пари делумно го вратив долгот. Не можев да спијам, колку времето поминуваше, толку ми стануваше потешко. Долгот продолжи да се зголемува, а јас се коцкав само да за да го вратам. Ми е закануваа, ќе ти ги скршиме нозете“, зборувал Фаџоли на сослушувањето.
Своите казни сега ги чекаат и останатите вмешани фудбалери, а најсериозен може да биде случајот на Сандро Тонали кој е обвинет дека се обложувал на натпревари на Милан и тоа додека бил член на „росонерите“.
