Кавадаречкиот градоначалник Митко Јанчев на денешната седница на Советот општината најави средба во Владата утре со премиерот Христијан Мицкоски и со новиот сопственик на поранешниот металуршки гигант „Фени“. Тема ќе биде почетокот на работа на печката за топење никел во комбинатот во Кавадарци.

Новиот сопственик ќе ја посетел и фабриката. Јанчев најави и исплата на заостанатите плати за вработените во рамките на стечајот, што беше отворен врз капацитетот, пред неговата продажба. Ќе се разговарало и околу можноста за обесштетување на транспортерите на руда, кои побаруваат пари за транспортот од пред стечајната постапка. Јанчев рече дека новиот инвеститор досега вложил околу 45 милиони евра во комбинатот за фероникел.

Градоначалникот повика да се бара одговорност околу тоа зошто немало финансиска контрола на работењето на „Фени“ во изминатиот период, а според него, имало сомнеж за скриена добивка. Тој јавно ги повика институциите да го испитаат случајот, да се направи контрола како дошло до стечајот и „да се види кој го зел кајмакот“.

– Замислете, до самиот стечај на „Фени“, до денот на отворање на стечај, да си миниш плата по девет илјади евра. Притоа, немајќи производство девет месеци, рече Јанчев, коментирајќи ги менаџерски договори.

Јанчев се осврна и на тоа какви договори своевремено потпишале транспортерите за транспорт на руда и ја појасни неповолноста во тие договори, додавајќи дека некој профитирал од нив. Пред стечајот, во „Фени“ работеа околу 800 луѓе.