Глобалната индустрија за игри беше обележана со нестабилност минатата година, но немаше големи затворања на проекти или студија во Србија, покажа најновиот годишен извештај за состојбата на индустријата за игри. Како што соопшти Здружението на индустријата за видео игри на Србија, „гејмерската индустрија“ лани остварила приход од 175 милиони евра, што е за 117 отсто повеќе од една година претходно, а според последните податоци од членовите на здружението, рекорден број отворени работни места ќе има до крајот на оваа година во српската индустрија за игри, објави Политика.рс.

Се очекува оваа година бројот на вработени да се зголеми за повеќе од 10 проценти и до крајот на 2024 година да бидат отворени најмалку 470 работни места. Покрај тоа, дури 70 отсто од вработените во оваа индустрија се чувствуваат оптимисти за иднината на оваа гранка, а видео игрите произведени во Србија се инсталирани повеќе од 100 милиони пати. Ова се само некои од примерите на добра практика во оваа гранка на индустријата.

Во ова здружение проценуваат дека во Србија сега работат 4.300 професионалци за игри. Во белградското студио за развој на мобилни игри „Плејстудиос“, кое е член на ова здружение, објаснуваат дека се работи за висококвалификувани кадри специјализирани за уметничка и креативна режија, проектен менаџмент, програмирање и различни административни позиции.

– Кога станува збор за побарувачката на кадри, најголем предизвик е да се најдат луѓе кои имаат соодветно образование за работа во индустријата за игри, а недостатокот на соодветни профили е особено евидентен кога станува збор за високо специјализирани позиции. Кај нас формалното образование се одвива во соработка со гејмерски студија и различни факултети, а во изнаоѓањето кадар голема улога играат програмите за преквалификација, самостојното учење и подготвеноста на заедницата да споделува знаење и искуство – вели Светлана Микиќ од „Плејстудиос“.

Според податоците на здружението, кога станува збор за персоналот, 28 отсто од вработените во игрите се жени, а дури половина од сите тимови на чело имаат жени. Има околу 150 компании, студија и тимови. Главни развојни центри се Белград, Нови Сад и Ниш. Трите области кои се на врвот по број на вработени се програмирањето, уметничките професии и контролата на квалитетот, наведуваат во здружението и додаваат дека рекорден број тимови подготвуваат апликации за локални и европски фондови. Исто така, мнозинството од испитаниците годинава како најголеми пречки во водење бизнис го наведуваат немањето можности за финансирање, високите даноци, сложените бирократски процедури…