Директивата за обновлива енергија има за цел да го зголеми уделот на енергија произведена од обновливи извори во економијата на ЕУ. До 2030 година 42,5 отсто од потрошената енергија во ЕУ ќе доаѓа од обновливи извори, според целите поставени во директивата.

Со цел да се поттикнат обновливите извори на енергија во целата економија и да се постигне целта на ЕУ, поставени се цели специфични за секторите. Така во згради 42 проценти од енергијата треба да доаѓа од обновливи извори, во индустријата употребата на обновливи извори треба да се зголемува за 1,6 проценти годишно, а во транспортот најмалку 29 проценти од енергијата треба да доаѓа од обновливи извори или интензитетот на емисијата на транспортните горива треба да се намали за 14,5 отсто.

Користењето на помалку енергија значи помалку емисии на стакленички гасови, помалку загадување, повеќе прифатлива енергија за граѓаните.

Со цел да се намали употребата на фосилни горива и постепено да се префрли на почиста енергија, ЕУ усвои мерки за поддршка на употребата на обновливи извори и гасови со ниска содржина на јаглерод. Пакетот за водород и декагрбонизиран гас усвоен во мај 2024 година има за цел да создаде пазар за водород и да постигне капацитет од 40 гигавати на обновливите извори на електролиза на водород до 2030 година, известува АЕРС.

Повеќе од една третина од емисиите на стакленички гасови во ЕУ се произведуваат во градежниот сектор. Директивата за енергетските перформанси на зградите има за цел да ги направи зградите во ЕУ енергетски поефикасни до 2030 година и понатаму. Крајната цел е сите згради во ЕУ да бидат згради со нулта емисија до 2050 година. За да се постигнат овие цели, директивата наложува намалување на просечната потрошувачка на енергија во станбените згради – најмалку 16 проценти до 2030 година и најмалку 20-22 проценти до 2035 година. Покрај тоа, треба да се развие поголема инфраструктура во зградите за велосипеди и електрични автомобили.