Околу 80 предмети отворени во 2021 година по сопствена иницијатива и по увид во својата евиденција, членовите на Државната комисија за спречување на корупцијата (ДКСК) на денешното продолжение на шестата седница донесоа одлуки да се затворат и архивираат поради застареност.

Станува збор за случаи на именувани службени лица главно за членови на управни и надзорни одбори на јавни претпријатија, здравствени институции, клиники, казнено-поправни институции и други државни институции кои по престанокот на функцијата не го испочитувале законски утврдениот рок од 30 дена да поднесат анкетен лист за имотната состојба до ДКСК.

За овие случаи ДКСК во законски утврдениот рок не поднело прекршочна постапка, па настапила застареност за прекршочно гонење поради што, констатираа антикорупционерите, не може да се поведе или да се води постапка, бидејќи согласно Законот за прекршоци (чл. 41) „прекршочната постапка не може да се поведе ниту да се води ако поминат две години од денот кога е сторен прекршокот“.

Согласно чл. 109 од Законот за спречување на корупција и судир на интереси, неподнесувањето на изјава за имотната состојба при стапување на функција и по престанување на функцијата, односно вработувањето, предвидена е глоба од 300 до 500 евра.

Според реферирањето на антикорупционерите на јавната седница, во 20-тина случаи функционерите ја платиле изречената глоба, а десетина платиле само половина од паричната казна и сите случаи се затворени.

ДКСК расправаше и за неколку пријави за постоење на судир на интереси, главно за непотизам, односно имало пријава дека градоначалник на една општина ја унапредил својата сопруга од соработник во советник за што тој бил парично казнет по утврдувањето на фактичката состојба во општината. Исто така, пријавител поднел пријава со обвинување дека директор на основно училиште си ја вработил ќерката, но проверките покажале дека тоа не било случај. Антикорупциска навремено реагирала по пријавите дека постои судир на интереси кога исти лица се именувани на две функции.

Меѓу пријавите кои ги отворија и затворија како ненадлежни да постапуваат, имаше и против судии, јавни обвинители, извршители.