Модната дизајнерка Ирина Тошева објави дека започнува соработка со затворот „Идризово“, во чиешто женско одделение ќе организира креативни работилници насочени кон стекнување нови вештини кои ќе им помогнат на осуденичките да најдат работа и да се ресоцијализираат, откако ќе ја одлежат казната.

„Оваа иницијатива ќе им овозможи на осудените лица во женското одделение да стекнат и усовршат нови вештини, со што ќе станат поконкурентни на пазарот на трудот по нивното ослободување. Преку креативен ангажман и учење, ќе развијат вештини кои ќе им дадат чувство на исполнетост и личен развој“, вели Тошева во објава на социјалните мрежи.

Таа додава дека тие вложуваат време и ресурси, но потребна им е поддршка за да ги обезбедат материјалите и машините потребни за старт.

„Доколку сте заинтересирани за соработка или донација, ве охрабруваме да ни се обратите. Заедно можеме да направиме значајна разлика и да им овозможиме подобри можности за иднината!“, вели Тошева.

„Со години наназад, преку мојата работа и успешни проекти, докажав дека со креативни ангажмани може да се направи разлика. Организацијата Конект ме поврза со Женското одделение, каде што веќе се спроведуваат мали активности за плетење. Со голем ентузијазам и идеи предложив оваа иницијатива да се прошири и да прерасне во нешто многу поголемо и сериозно. Раководството одговори со отвореност кон моите предлози, и нетрпеливо го очекуваме почетокот“, изјави Тошева за „СДК.мк“.