Дискографската куќа „Шарла рекордс“ организира слушачка промоција на албумот „Омерагиќ и Спировски – (слобода)“ во „ре:старт“
Независната дискографска куќа „Шарла рекордс“ организира слушачка промоција на изданието број 111 во вид на втор албум на импров џез-дуото Дени Омерагиќ и Нинослав Спировски со наслов „Омерагиќ и Спировски – (слобода)“.
Препорачано
Музичкото матине ќе се случи во петок (20.06.2025) во продавницата за музички изданија „re:start“ во ГТЦ, со почеток во 16 часот. Албумот излегува на компакт-диск во лимитиран тираж, а достапен ќе биде и во дигитална форма преку Bandcamp-профилот на „Шарла“.
Дени Омерагиќ и Нинослав Спировски иако сѐ уште релативно млади, веќе се во категоријата на искусни музички автори и изведувачи со завиден број албумски изданија и концертни настапи во регионот и пошироко.
Нивната прва соработка е во бендот „Fighting Windmills“, за првиот сериозен успех на меѓународна сцена да го постигнат преку изданијата на „Светлост“ и „Одрон ритуал оркестра“, засилени со уште неколку истакнати џез-музичари.
Како дуо, нивната работа започна во 2020 година со албумот „Two Ways East“ („Шарла“, DR062), со кој јасно ја одредија својата ориентација кон нов звук со исклучително свежи и храбри музички идеи.
– Ако во тој материјал ги артикулираа музичките страсти на две пијана, овде се во својата матична инструментална поставка – контрабас и тенор саксофон/кларинет. Но, само навидум. Звучната слика е далеку покомплексна со оглед на експерименталниот пристап поткрепен од еден куп звучни ефекти, вокални елементи и лупови создавани во текот на самиот студиски процес на снимање во живо. Се работи за двајца врвни музички визионери и „разбојници“ во исто време, во чиј авангарден авторски израз ќе ги сретнете влијанијата на панкот и фри-џезот, анархизмот и борбата за работничките права, социјалниот менталитет на Чаир и Ѓорче Петров, и секако – волшебниот апсурд на 21 век. И сѐ тоа, само и единствено во име на универзалниот порив и потреба на човекот за – слобода – истакнуваат од „Шарла рекордс“.
Албумот е снимен и во целост реализиран во тонското студио „Кларион“ од Дејан Ангелевски. Како продуценти се потпишуваат самите автори, а насловната фотографија за албумската корица е на Глигор Кондовски.
