Извршниот директор на „Телеком Србија“, Владимир Лучиќ, вчера беше фотографиран во колона поддржувачи на владејачката Српска напредна партија (СНС) во белградската населба Вождовац, објави Нова.рс.

Лучиќ беше на „собир против блокадите“ на кој присуствуваше и самиот српски претседател Александар Вучиќ, министерот за финансии Синиша Мали, претседателката на Парламентот Ана Брнабиќ и други високи функционери на владејачката партија.

Лучиќ не бил снимен во нивно друштво, но бил снимен во моментот кога колоната поддржувачи поминала покрај Факултетот за организациски науки. Лучиќ се насмевнал додека толпата околу него скандирала „Ацо Србине“, а кога сфатил дека некој го снима на неговиот телефон, рекол само: „не, не, не, не…“

Лучиќ и Милер преговараат за отпуштање на Александра Суботиќ

Лучиќ е предмет на внимание на јавноста – и домашно и меѓународно во последните денови поради аудио снимка од разговор со извршниот директор на „Јунајтед груп“, Стен Милер.

На снимката објавена од Проектот за известување за организиран криминал и корупција (ОЦЦРП), може да се чуе како Лучиќ и Милер преговараат за отпуштање на Александра Суботиќ, извршна директорка на „Јунајтед медија“, под чие раководство работат медиумските куќи Н1, Нова С, Данас и Радар.

„Ќе ве запалиме, само чекаме дозвола“: Редакцијата на Н1 во Србија мета на секојдневни закани

Во овој разговор, Лучиќ му кажува на Милер дека претседателот на Србија побарал Александра Суботиќ да биде отпуштена и објаснува дека пред отпуштањето, прво мора да ја ослабне компанијата што ја води.

„Проблемот е што премногу работи се случуваат пребрзо на премногу фронтови, вклучително и оваа работа во Србија. (…) Не можам да ја отпуштам Александра денес, како што разговаравме, во ред? Морам да ја направам таа компанија многу мала во Србија, ако разбирате што мислам. Да ја одвојам. (Потребно е) време за тоа, и за тоа се договоривме“, му вели Милер на Лучиќ во разговор до кој дошле новинарите на ОЦЦРП.

Лучиќ му рекол на Милер дека српскиот претседател Александар Вучиќ веќе разговарал за смената на Суботиќ со човекот над него во корпоративната хиерархија – Никос Статопулос, претседател на БЦ Партнерс (инвестицискиот фонд кој е мнозински сопственик на Јунајтед Груп).

„Значи, претседателот побарал од Никос брзо да ја замени само Александра Суботиќ, а не директорите на никого во Н1 или Нова С. Тој бил свесен дека сега е тешко да се смени директорот на некого без реорганизација“, рече Лучиќ.

„Телеком Србија“, медиумите и блискоста со Вучиќ

Иако Лучиќ се обиде да негира во следните денови дека Вучиќ побарал отпуштања во „Јунајтед медиа“, самиот Вучиќ рекол дека можел да ја затвори „Јунајтед медиа“ ако сакал.

„Ако сакав да ги затворам во кое било време, ќе ги затворевме. Не сакав затоа што би се сметал за неспособен за ништо ако не бев во можност да ги победам нивните лаги“, рече Вучиќ.

Лучиќ и Вучиќ се блиски сојузници со години, а извршниот директор на „Телеком Србија“ редовно ја изразува својата поддршка за Вучиќ и неговите потези. Пред околу една година, зборувајќи за дипломатските напори на претседателот, тој изјави дека „Вучиќ се бори како лав“.

Дека се блиски се покажа и неодамна, пишува Нова.рс.

За време на посетата на селата погодени од пожарот, Вучиќ го повика Лучиќ во живо пред камерите и му нареди да инвестира дел од парите во тие општини.

„Подобро дајте им дел од парите на сиромашните (…) Ме разбирате? Тоа е мојата молба. Оставете ги телефоните на сиромашните“, му рече Вучиќ.

Одговарајќи на прашањата на КРИК, Лучиќ сепак го опиша својот однос со Вучиќ како „строго професионален и институционален“.

Лучиќ го презеде управувањето со Телеком во 2020 година, а оттогаш, државната компанија направи низа деловни потези насочени кон контрола на медиумите и кабелските оператори. Така, Телеком купи и лансираше неколку телевизиски станици, вклучувајќи ги „Евроњуз Србија“, „Блумберг Адрија“ и „Њузмакс Адрија“. Стана најголем огласувач во земјата и дава најмногу пари за рекламирање на провладини весници.

Телеком купи и помал кабелски оператор, „Коперникус Технолоџи“, за дури 195 милиони евра. Компанијата ја купи од Срѓан Миловановиќ, чиј брат е влијателен член на Српската напредна партија во Ниш, а експертите тврдеа дека цената е нереално висока, дека Телеком значително преплатил за компанијата.

Кратко потоа, Миловановиќ купи две национални телевизиски станици, „Прва“ и „Б92“, за 180 милиони евра, кои станаа дел од пропагандната машинерија на владата.