Директорот на Неврологија, Фатмир Меџити, бил хонорарец на Министерството за здравство за 1.000 евра месечно
Актуелниот директор на Клиниката за неврологија Фатмир Меџити, во исто време додека директорувал со оваа јавна здравствена установа, бил и хонорарец на Министерството за здравство кое инаку го назначило за директор, а месечниот хонорар му бил 60 илјади денари, покажуваат документите со кои располага „Слободен печат“. Од договорот не може да се сфати што работел Меџити за овој хонорар, но може да се сфати дека работните задачи за Министерството за здравство требало да ги врши секој ден. Податоците на „отворени финансии“ покажуваат дека парите од Министерството му се префрлани секој месец, во износ од 1.000 евра заклучно со декември 2024 година.
Препорачано
-
1
-
2
-
3
Договорот за дело склучен меѓу Меџити и Министерството за здравство, траел од 8 јули 2024 до 31 декември 2024 година. Во овој период тој имал задачи коишто требало да ги извршува за Министерството за здравство секој ден, и покрај тоа што секој ден имал работни задачи и на Клиниката за неврологија со која директорувал и до ден денешен директорува. Договорот е склучен непосредно откако министер за здравство стана Арбен Таравари, сопартиец и личен пријател на Меџити. Во периодот кога Таравари бил министер, најмалку две лица семејно поврзани со Фатмир Меџити исто така склучиле договори со Министерството за здравство за да извршуваат работни задачи внатре на определено време, покажува документацијата со која располагаме.
Но, кога нашата редакција се обиде да дознае кои активности ги вршел Меџити за да добива ваков месечен хонорар од 1.000 евра од Министерството за здравство, наидовме на бариера. Ниту од содржината на договорот не може да се дојде до суштината на работните задачи што ги извршувал Меџити како хонорарец на Министерството. Министерството за здравство пак молчи на нашите прашања и барања за слободен пристап до информации од јавен карактер поради што „Слободен печат“ вложи жалба до Агенцијата за заштита на правото на слободен пристап до информации од јавен карактер.
Министерството за здравство всушност има склучено вакви хонорарни договори со повеќе лица и сите се со истата содржина, односно се договори „по терк“. Се разликуваат само износите на исплатените хонорари и времетраењето на договорниот однос, но членот 2 во кој се опишува што точно треба да работи хонорарецот за да ги добие исплатите, кај сите е ист. Конкретно, за Фатмир Меџити членот 2 од договорот со кој се уредуваат неговите обврски како хонорарец на Министерството за здравство во периодот од 8 јули 2024 до 31 декември 2024 гласи:
На Клиниката за неврологија каде Меџити е директор, како и на неговата мејл адреса се обративме со прашања какви работни задачи вршел со договорот за дело што го имал во Министерството за здравство, но добивме чуден одговор.
Ве известуваме дека ЈЗУ Универзитетска клиника за неврологија – Скопје нема надлежност да постапува по однос на поставеното прашање. Во врска со оваа проблематика, потребно е да се обратите до друга соодветна институција, ни рекоа оттаму.
Побаравме прашањата Клиниката да ги проследи до директорот Меџити од кого ги побаравме одговорите, но повеќе не добивме одговор од нив на дадената тема. Министерството за здравство не одговори на нашите барања за слободен пристап до информации од јавен карактер со кои баравме да ни се достават месечните извештаи за сработените активности од страна на Меџити во времето додека бил хонорарец за Министерството за здравство.
Меџити поставил камери на Неврологија без јавен повик – тврди дека се донација
Меџити е поранешен министер за здравство и актуелен директор на Клиниката за неврологија. Дел од вработените на Клиниката деновиве реагираа во редакцијата на „Слободен печат“ со забелешка дека во ходниците и во една од просториите во Клиниката каде што престојуваат сестрите, забележале монтирани камери за кои тврдат дека не се сигурни дали работат и дали снимаат тонски.
За овие камери директорот Меџити нема распишано повик за јавна набавка како што е случај со останатите директори на клиниките, кои кога поставуваат видео-надзор распишуваат тендер, определуваат агенции кои ќе располагаат со снимките итн. Од Клиниката за неврологија за „Слободен печат“ тврдат дека камерите биле донација и не снимаат ништо моментално. Тендер велат дека не распишале, зашто камерите им ги донирала фирма – „ДАТАСАТ Џенгиз Мухарем Мухарем“, а монтирани се во мај 2025 година.
„Во однос на прашањето за поставените камери за видео надзор, ја информираме јавноста дека тие се донација и се монтирани во согласност со потребите за заштита на сопственоста и безбедносен надзор во делови каде се чуваат лекови, хигиенски средства и храна. Камерите во моментот не се во функција а нивнто активирање ќе биде извршено согласно законските прописи за заштита на лични податоци, со целосна транспарентност. Камерите се поставени во простории кои се наменети исклучиво за административна и логистичка работа како сестрински соби со шкафови со медикаменти, магацин за материјали за хигиена и дел од влезот каде е сместена количката со храна“ велат за „Слободен печат“ од Клиниката за неврологија.
Додаваат дека во овие простории не се вршат медицински прегледи, интервенции и други активности со пациентите и камерите не се на места на непосредно укажување здравствена заштита.
Надзорот е насочен исклучиво кон заштита на залихи, спречување на злоупотреба и контрола за влез/излез на службени лица. За поставените камери е определено одговорно лице, изготен е правилник за начинот на вршење видео надзор. За целосна усогласеност со законите испратено е известување до Дирекцијата за заштита на личните податоци иако обврската при поставување на видео надзорот не е облигаторна, додаваат од Клиниката за неврологија.
