Директорот на Меѓународниот институт за блискоисточни и балкански студии (ИФИМЕС) од Љубљана, Зијад Беќировиќ, вечерва на 24-от Економски форум во Белград оцени дека земјите од Западен Балкан не можат да станат членки на ЕУ без силна поддршка од Соединетите Американски Држави.

Беќировиќ, според „Танјуг“, рекол дека Србија цврсто стои на европскиот пат и, што е уште поважно за регионот, има стратешко партнерство со САД и неодамна потпишан енергетски договор.

„Имам впечаток дека САД повеќе го поддржуваат патот кон ЕУ на овие земји од Западен Балкан, вклучувајќи ја и Србија, отколку што тоа го прават одредени земји-членки на Европската унија“, вели Беќировиќ.

Во рамките на панел-дискусијата за политичката соработка во регионот, на која учествуваше и поранешниот американски амбасадор во Србија Кристофер Хил, Беќировиќ истакнал дека стратешкото партнерство меѓу Србија и САД и енергетскиот договор се многу важни, бидејќи „ЕУ немаше да постои без САД“.