Директорот на Ферари, Фредерик Васер, изјави дека неговиот тим во моментов нема најдобар болид во шампионатот на Формула 1, но нагласи дека тимот развил добра стратегија за Големата награда на Емилија Ромања, која се одржа во недела на патеката Имола.

Возачот на Ферари, Луис Хамилтон, ја заврши трката во Емилија Ромања на четвртото место, додека неговиот тимски колега Шарл Леклер беше шести.

– Темпото на трката беше силно од почеток до крај и тоа е позитивно. Стратегијата беше добра и добро спроведена. Сепак, постои и малку фрустрација, бидејќи мислам дека можевме да постигнеме повеќе доколку стартувавме од подобри позиции – изјави Васер за „Скај Спортс“.

Леклер ја започна трката во Имола од 11 позиција, додека Хамилтон ги заврши квалификациите за ГН на Емилија Ромања на 12 место.

– Во последните три или четири викенди имавме оваа разлика помеѓу брзината во квалификациите и во трката. На трката во Џеда бевме најбрзи на патеката, а во квалификациите заостанувавме три десетинки. Истото се случи и во Мајами. Веројатно беше ист случај и овој викенд. Макс ферстапен беше најбрз. Немаме најдобар болид, блиску сме во овие услови, мора да направиме чекор напред во квалификациите – истакна директорот на Ферари.

Леклер е на петтото место во генералниот пласман кај возачите со 61 бод, додека Хамилтон е на шестата позиција со 53. Следната трка во шампионатот на Ф1 ќе се одржи на 25 мај за Големата награда на Монако.