Делегации од САД, Обединетото Кралство, Франција и Германија итаат во Дамаск за да воспостават контакти со новите бунтовнички власти, кои сѐ уште се на списоците со терористички организации во Вашингтон, Брисел и во Њујорк. Руските војници од Хмејмим и Тартус, кои до неодамна ги бомбардираа позициите на групата ХТС, сега разменуваат цигари и по некој збор со бунтовниците, кои мирно стражарат околу руските бази.

Бунтовничкиот лидер Абу Мохамед ал Голани, чија група до пред осум години беше дел од терористичката мрежа Ал Каеда, вчера во костум и раскопчана кошула разговарал со делегати испратени од британското Министерство за надворешни работи. Денеска, пак, имал состаноци со дипломати од Германија и од Франција. Американскиот државен секретар Ентони Блинкен не го посети Дамаск во рамките на својата блискоисточна турнеја, но изјави дека е воспоставен комуникациски канал со бунтовниците што во дванаесетдневна офанзива го соборија режимот на Башар ал Асад.

Некогаш моќната сириска армија не го попречи нивниот поход кон главниот град, а сега, десет дена по бегството на Асад во Москва, повеќе не може да се забележи низ Дамаск. Израел ја искористи хаотичната ситуација за да ги бомбардира стратегиските воени центри на Сирија. По два дена напади, уништени се целата сириска борбена флота, речиси целата ескадрила и аеродромите, базите со проектили како и магацините со муниција и оружје.

Никој, сепак, ниту ги нападнал ниту ги загрозил двете големи руски воени бази во Сирија – воздухопловната Хмејмим и пристаништето Тартус, близу Латакија.

– Не се чувствуваме загрозени, се надеваме дека ќе изградиме пријателски односи со новата влада веднаш штом стане легитимна – изјавил руски офицер во разговор со репортерот на „Гардијан“ во Хмејмим.

Мирно било и на влезот во базата, каде што едни спроти други стражарат вооружени војници и бунтовници. Руски војник му понудил запалена цигара на бунтовник, кој ја прифатил и се заблагодарил со кренат палец, раскажува репортерот.

На војниците им е дозволено слободно да излегуваат и да се враќаат во базата. Неколкумина биле забележани како пазаруваат во градот Хмејмим, во продавници со промоции напишани со кирилично писмо.

Комуникациите со бунтовниците, всушност почнале пред една недела, за да се координираат воените дејности.

– Сѐ е мирно, двете страни се воздржуваат од провокации – изјавил рускиот претставник.

Тој покажал кон кутии со хуманитарна помош, за кои објаснил дека се „подарок од Русија за Сиријците“.

Борците на ХТС, пак, рекле дека повеќе не им пречи татнежот на авионите „миг“ во базата. До неодамна тој звук бил последната тревога што најавувала проектили и бомби.

– Порано се плашевме кога ќе слушневме звук на руски авион, сега сѐ стана нормално – изјавил 26-годишниот Абу Халед.

Претставници на бунтовниците објаснуваат дека веќе почнале преговори со руски претставници за прашањето како може Москва да ги задржи своите бази во Сирија, кои ги изнајми на 50-годишно користење во договор со режимот на Башар ал Асад. Базите овозможуваат руски излез на топло море и служат како логистички јазол за операциите во Африка.

ХТС ја одбил понудата од Русија да достави хуманитарна помош за да ги задржи базите, но бунтовниците најавија дека основата за преговорите нема да биде идеологијата туку стратегиските интереси. Двете страни ќе разговараат и за судбината на Асад. Сиријците бараат тој да биде екстрадиран за да одговара за злосторства врз сопствениот народ.

Нов извештај од Дамаск укажува дека во Кутајфа, 40 километри северно од главниот град, е откриена една од петте огромни масовни гробници во кои режимот на Асад ги фрлал телата на убиените затвореници.

– Во гробницата има сто илјади тела. Тоа е екстремно конзервативна процена – изјавил Муаз Мустафа, шеф на Сириската служба за итни ситуации.

Тој тврди дека во регионот има уште неколку масовни гробници, во кои покрај Сиријци биле закопувани и убиени Американци, Британци и други странски државјани.