Претседателката на Државната комисија за спречување на корупцијата (ДКСК), Татјана Димитровска, денеска одговорајќи на пратеничко прашање околу членот на ДКСК, Цвета Ристовска и нејзиниот ангажман во Универзитетот за туризам и менаџмент, рече дека таа нема склучено договор за финансиски надоместок и не е член на наставниот кадар на Универзитетот, а предметите се распределуваат електронски. Ристовска во ДКСК го водеше предметот поврзан со директорот на АНБ Бојан Христовски, дел од кој беше и проверката на валидноста на неговата диплома издадена токму од Универзитетот за туризам и менаџмент.

Димитровска вели дека во случајот нема судир на интереси.

-Членот на Комисијата нема склучено договор за финансиски надоместок и не е член од наставниот кадар на Факултетот. Таа последен пат била ангажирана како експерт-предавач пред околу четири години. Во однос на начинот на распределба на предметите, истиот е уреден во Деловникот за работа на Комисијата. Предметите се распределуваат електронски и нема можност за човечки фактор, односно субјективизам. Ги почитуваме строго овие правила кои се утврдени во Деловникот и Законот, рече Димитровска.

Таа нагласи дека ДКСК носи одлуки само врз основа на проверени, утврдени и институционални факти и информации за секој поединечен случај по кој што постапува.

Како што рече, одлуката во однос на именувањето на директорот на Агенцијата за наицонална безбедност била донесена врз основа на овие принципи и во рамките на надлежностите на Државната комисија.

-Во однос на надлежностите утврдени со Закон, ДКСК нема надлежност да утврдува и постапува доколку во одредени случаи постојат индиции за доставени неверодостојни документи. Одлуката во однос на именувањето на директорот на Агенцијата за национална безбедност беше донесена врз основа на овие принципи и во рамките на надлежностите на Државната комисија. За сите други индиции, постојат надлежни органи кои постапуваат во рамките на своите законски надлежности, рече Димитровска.

Членката на ДКСК Цвета Ристовска беше наведена како предавач на Универзитетот за туризам и менаџмент во официјалните професионални биографии објавени и на веб-страницата на Универзитетот, и на сајтот на ДКСК.