Бразилската полиција истражува бизарен случај на смрт на 20-годишна девојка, чие тело било пронајдено со 26 Ајфон уреди залепени директно на кожата, пишува Мирор.

Инцидентот се случил во автобус во градот Гуарапуава, државата Парана, каде девојката се онесвестила и починала по неуспешна реанимација. Според информациите, таа патувала сама од Фос до Игуасу кон Сао Паоло.

Според воената полиција, жената била пронајдена свесна, но имала сериозни проблеми со дишењето. Лекарите од службата за итни случаи се обиделе да ѝ помогнат, но набрзо дошло до срцев застој. Реанимацијата траела околу 45 минути, но без успех – жената починала на лице место.

При интервенцијата било откриено дека носела голем број сокриени телефони. Во нејзиниот багаж биле најдени и шишиња со алкохол. Обдукцијата ќе треба да ја утврди точната причина за смртта, а случајот е предаден на царинските и истражните органи.

Бразил се соочува со растечка појава на шверц на електроника, особено поради високите цени на уредите како Ајфон.