Во недела ќе се игра дербито во Втората македонска фудбалска лига помеѓу Воска Спорт и Вардар на стадионот „Билјанини извори“ во Охрид.

Две екипи кои претендираат следната натпреварувачка сезона да играат во Првата македонска лига.

Најпрвин Воска Спорт ја информираше јавноста дека нема да се дозволи присуство на гостински навивачи.

Потоа, од ФК Вардар побараа од своите ривали во интерес на македонскиот фудбал да дозволат навивачите на скопските „црвено-црни“ да бидат дел од ова дерби во 2МФЛ.

Најновата информација доаѓа од ФК Воска Спорт кој пренесува дека овој меч ќе се игра без публика.

– Ги известуваме сите љубители на фудбалот, особено оние на ФК Воска спорт, дека дерби натпреварот од 25 коло против Вардар ќе се одигра без присуство на публика. Ваквата одлука е донесена поради безбедноста на натпреварот кој нашата градска полиција го прогласи за висок ризик. Да не ризикуваме ниту еден човек и пред сè да не го ризикуваме фудбалот, и како тим решивме мечот да го играме без навивачи. На натпреварот кој ќе се одржи на стадионот „Билјанини Извори“ од двете екипи ќе бидат присутни само по 10 лица. ФК Воска Спорт ќе ги преземеме сите безбедносни мерки за одржување на овој натпревар, кој се надеваме дека ќе помине во рамките на фер-плејот. Нека победи подобриот. Пред сè нека победи фудбалот – стои во соопштението на ФК Воска Спорт.