Црногорскиот премиер Милојко Спајиќ објави дека 28 јули е прогласен за Ден на жалост во земјата како израз на почит кон изгубените човечки животи во низата трагедии што се случија во Црна Гора во претходните денови.

„Ја споделуваме тагата и стоиме со семејствата на жртвите“, рече црногорскиот премиер, пренесува Еуроњуз.

За само десет дена, од 16 до 26 јули, Црна Гора загуби 12 животи во низа инциденти што вклучуваа несреќи, семејни трагедии, вооружени конфликти и криминални судири.

Во двојното убиство викендов во Будва, убиени се татко и син, а осомничен е брат и чичко, кој ги убил членовите на семејството поради расправија за превоз на патници со брод.

Во четврток, телата на татко и ќерка беа пронајдени во Голија, на околу 50 километри од Никшиќ, а полицијата објави дека станува збор за убиство и самоубиство.

На 20 јули, млад човек од Подгорица се удави во Морача, истиот ден човек од беранското село Заграѓе беше убиен од удар од гром, а претходно истиот ден едно лице загина во сообраќајна несреќа во Ѓеновиќи.

На 22 јули, двајца млади мажи од градот Јаковиќи го загубија животот со давење во реката Тара, во близина на градот Слатина.

Два дена подоцна, на 24 јули, српскиот државјанин С. П. загина во сообраќајна несреќа во градот Близикуќе во близина на Будва. Од другите жртви, еден човек беше застрелан, а 16-годишно момче беше брутално претепано и избодено пред дискотека.