Не се точни информациите и тврдењата дека сме имале состаноци со странски активисти и дека имаме политичка или надворешна поддршка, вели за „Слободен печат“ студентка (името ѝ е познато на редакцијата) што била присутна на онлајн состанокот со српска студентка, за што во јавноста излезе видео-снимка.

Таа и други студенти реагираат на начинот на кој е прикажан контекстот и дискусијата што се водела на средбата.

„Во јавноста се шират неточни информации за нашата група, вклучувајќи тврдења дека сме имале состаноци со странски активисти и дека постои политичка или надворешна поддршка. Вистината е поинаква – разговорот што се спомнува беше обична средба со студентка од Србија, која сподели свои искуства без никаква политичка агенда.

Жалиме што клипот беше пресечен и изваден од контекст, со недовршени реченици кои создаваат сосема поинаков тон и поинаква слика од вистинската намера.

Целта никогаш не била манипулација, туку јасна порака: ова не е ништо нелегално, туку демократско право на студентите да се организираат.

Загрижени сме за заканите и обидите за јавна дискредитација преку споделување на лични информации и разговори извадени од контекст“, тврди студентката.

Ваквата постапка, според неа, ја загрозува нивната безбедност, но истовремено создава лажен наратив за нивните намери. Притоа нагласува дека разговорот бил целосно јавен – и линкот за повикот и самиот настан биле споделени јавно во групата на студентите, со целосна транспарентност.

„Ништо не се криеше. Во медиумите се појавуваат обвинувања дека одделни студенти се претставени како водачи или политички пратеници, што не е точно. Нашата иницијатива е хоризонтална, без лидери и без политичка агенда.

Дополнително, дел од медиумските напади доаѓаат од извори со политички врски, што отвора сомнеж за нивната неутралност. Ова не е првпат независни студентски иницијативи да се соочат со координирани обиди за дискредитација, но остануваме посветени на нашите цели – слободно и транспарентно изразување на студентските ставови“, додава таа.

Студентите, како што велат, имаат основано сомнение дека снимката што циркулира во јавноста е споделена од луѓе блиски до студентското собрание, кои имаат политичка агенда.

„Нивните обвинувања се дел од координиран напад со цел да нѐ прикажат како закана и да ја нарушат нашата иницијатива. Не прифаќаме да ни се лепат етикети врз основа на изваден дел од искрен разговор. Повторно – сè беше јавно, затоа што немаме што да криеме“, вели студентката.