Турската авиокомпанија „Корендон ерлајнс“ („Corendon airlines“) најавува продажба на билети во зони само за возрасни, за летовите меѓу Амстердам и Курасао, кои обично траат околу 10 часа, пишува „АП њус“.

Авиопревозникот тврди дека, патниците кои патуваат без деца ќе добијат мирна средина, а родителите нема да се грижат дали нивните немирни деца, помлади од 16 години, ќе ги вознемируваат сопатниците. Оваа идеја се очекува да се реализира од ноември оваа година.

Минатата недела, авиокомпанијата објави дека ќе резервира 93 редовни седишта и девет седишта со дополнителен простор за нозете во зоната за возрасни, лоцирана напред на нејзиниот авион „Ербас А350“ со 432 седишта.

Ќе се постави ѕид или завеса, за да се одвои овој дел од останатите патници кои седат позади. Патниците ќе плаќаат дополнителен надомест од 45 евра за зоната без деца, додека цената за седишта со дополнителен простор за нозете ќе биде 100 евра.

Брет Снајдер, сопственик на туристичка агенција, укажа дека има побарувачка за седиштата само за возрасни, особено за оние кои сакаат да ја избегнат детската врева.

Туристичките работници веруваат дека таксата е доволно ниска, за да привлече многу патници и дека испробувањето на новите концепти ќе донесе позитивен публицитет на помалку познатата авиокомпанија.

Инаку, „Корендон ерлајнс“ не е првата авиокомпанија која нуди зона без деца. На пример, авиокомпанијата „Скут“ („Scoot“) од Сингапур продава билети за зона, за патници постари од 12 години.