Во пресрет на утрешниот ден, кој го означува почетокот на светиот месец Рамазан, дебарското муфтиство, кое ги опфаќа општините Дебар, Центар Жупа и подрачјето на Река, општина Маврово и Ростуше, и градоначалниците на трите општини, го честитаа почетокот на светиот месец со желби за прифатени пости и молитви.

– Првиот ден на постот ќе започне на 11 март (понеделник). На сите верници им посакуваме добро здравје и прифатени пости од Севишниот Аллах. Нека ви е честит и мубарек месец Рамазан – објави муфтиството преку Фејсбук.

Со истите желби светиот месец го честитаа и градоначалниците на Дебар, Маврово и Ростуше и на Центар Жупа.

– Ви посакувам светиот месец Рамазан да помине во побожност, мир и солидарност. Им честитам на сите што постат, возвишениот Бог да им ги прифати делата што тој ги проповеда – порача градоначалникот на Дебар, Хекуран Дука.

Градоначалникот на општина Маврово и Ростуше, Медат Куртовски, посака „месец со духовно исполнување, солидарност, меѓусебно почитување и заедништво меѓу луѓето“. Градоначалникот на Центар Жупа, Аријан Ибраим посака „добар пост и благословен Рамазан полн со светлина и мир“.

По едономесечниот пост, првиот ден на празникот Рамазан Бајрам е на 10 април. Овој голем муслимански празник се слави три дена.