Откако вработените во Државното правобранителство пред два дена стапија во штрајк, претседателот на Синдикатот на УПОЗ, Трпе Деаноски најави дека следната недела на протест излегуваат и вработени од шест министерства и Државниот завод за статистика.

Деаноски за МИА изјави дека на протест ќе излезат вработените од министерствата за култура, животна средина, европски прашања, дигитална трансформација, транспорт и врски, економија и труд.

Тој соопшти дека в понеделник официјално ќе биде објавено кој сѐ ќе учествува на протестот, бидејќи, како што рече, постои можност да се приклучат вработени и од други министерства.

– Во понеделник официјално ќе објавиме кој сѐ ќе учествува на протестот. Засега има шест министерства кои ќе излезат на протест, односно Министерство за култура, Министерство за животна средина, Министерство за европски прашања, Министерство за дигитална трансформација, Министерство за транспорт и врски, Министерство за економија и труд, како и вработените во Државниот завод за статистика. Барањата се потпишување на колективен договор, со којшто вработените ќе имаат 30 проценти додаток на плата – изјави Деаноски.