Данската влада планира да го укине данокот од 25% на книгите, моментално највисок во светот, за да ги охрабри граѓаните да читаат повеќе. Министерот за култура Јакоб Енгел-Шмит верува дека оваа политика придонесува за „кризата на читањето“ и ќе предложи укинување на данокот во буџетскиот план.

Овој потег ќе ја чини државата 330 милиони дански круни, или 44 милиони евра, годишно. Енгел-Шмит верува дека ова е неопходен ризик за да се реши кризата со читањето што се шири во последните години.

„Не се случува секој ден некој да успее да ги убеди колегите дека толку огромна сума пари треба да се инвестира во потрошувачката и културата на Данците“, рече министерот.

Додека другите нордиски земји, како што се Финска (14%), Шведска (6%) и Норвешка (0%), имаат пониски даноци на книги, Данска сака целосно да ги ослободи книгите од данок. Сепак, шведското искуство покажа дека намалувањето на данокот во 2001 година ја зголеми продажбата на книги, но тие најчесто ги купија оние кои веќе беа читатели.

Министерот изјави дека целта е да се шири литературата до пошироката популација, поради што веќе се издвоени пари за зајакнување на соработката меѓу јавните библиотеки и училиштата, за да можат децата подобро да се запознаат со добрата литература.

Во Данска, која има малку над шест милиони жители, во 2023 година беа продадени 8,3 милиони книги. Детските книги беа најпродавани, проследени од криминалистичките романи и трилерите. Енгел-Шмит најави дека внимателно ќе го следи движењето на цените на книгите по укинувањето на данокот.

„Ако се покаже дека укинувањето на ДДВ само води до зголемување на профитот на издавачите, а цените на книгите да не паѓаат, тогаш мора да размислиме дали тоа беше правилно“, додаде тој.