Доколку владите ширум светот го имплементираат шпанскиот модел на оданочување на супербогатите, би можеле да соберат повеќе од 2.000 милијарди долари на глобално ниво, се вели во извештајот на активистичката група „Такс Џастис Нетворк“, пренесува Танјуг.

На крајот на 2022 година, шпанската влада предводена од социјалистичкиот премиер Педро Санчез воведе привремен данок на богатството на поединци чиј имот се проценува на повеќе од три милиони евра, а се претпоставува дека оваа мерка се однесува на 0,5 отсто од најбогатите во Шпанија. Доколку таков данок би се применил за остатокот од светот, тој би донел огромна сума пари на глобално ниво, пишува Гардијан.

Четири земји од Групата 20 најголеми економии во светот, имено Бразил, Германија, Шпанија и Јужна Африка, потпишаа претходно оваа година предлог за воведување данок од најмалку два отсто на 3.000 милијардери во светот, што ќе обезбеди средства за борба против сиромаштијата и климатските промени. Министрите од споменатите земји наведуваат дека воведувањето данок на милијардерите ќе ја намали глобалната нееднаквост и ќе му помогне на светот да се справи со шоковите од пандемијата, климатската криза и воените конфликти во Европа и на Блискиот Исток.

„Време е меѓународната заедница сериозно да се зафати со нееднаквоста и финансирањето на глобалните јавни добра“, додадоа министрите.