Даниел Стариџ (33) стана стручен коментатор на „Скај Спорт“. Англиската телевизија објави дека поранешниот англиски напаѓач во недела ќе биде дел од емисијата во склоп на првото коло од Премиер лигата.

Стариџ така ќе ги коментира натпреварите заедно со Гери Невил, Џејми Карагер, Џејми Редкнап, Мика Ричардс, Рој Кин и останатите.

„Започнува Премиер лигата, возбуден сум што со „Скај Спорт“ ќе бидам вклучен во случувањата. Се веселам што на гледачите со моето искуство ќе можам да им презентирам што се случува на теренот. Ќе биде ова возбудлива сезона“, порача Стариџ на претставувањето.

Стариџ своевремено ја помина фудбалската школа на Манчестер Сити, а подоцна настапуваше за Болтон, Челси, Ливерпул, ВБА, Трабзонспор и Перт Глори. Во австралискиот клуб се обиде да ја оживее кариерата во 2021 година откако му заврши забраната за настапи од четири месеци поради кршење на правилата за обложување.

Но, овој клуб го раскина договорот со англискиот фудбалер поради проблемите со повреди и од јули 2021 година е без клуб.