Германскиот гигант Баерн Минхен веќе потврди дека Томас Тухел ќе замине на крајот од сезоната, но според последните информации можен е пресврт во ситуацијата.

Поголем дел од германските медиуми најавуваат дека се поголеми се шансите актуелниот стратег на баварскиот клуб да остане на функцијата и по завршувањето на сезона.

Како причина се наведува тоа што главните кандидати за негов наследник одбија да ја преземат екипата од „Алијанц Арената“. Баерн прво сакаше да го ангажира Чаби Алонсо, но тој одлучи да остане на клупата на Баер Леверкузен. Опција беше Јулијан Нагелсман, меѓутоа го продолжи договорот со Германија, а последен кој им се заблагодари на понудата беше Рафл Рагник.

Дури и Роберто Де Зерби кој се споменуваше како можна опција во својата последна изјава најави дека нема ништо против и да остане во Брајтон. Со останатите кандидати како Зидан, Конте, Клоп…воопшто и не се влезе во сериозни преговори.

Во насока дека може да има пресврт во ситуација е и последната изјава на Тухел пред новинарите.

„Да, постои тој договор со Баерн за заминување на крајот од сезоната. Тоа е факт. Сепак, секој договор може да се промени со заедничка соработка. Се е можно, ќе видиме што ќе се случи“, изјави Тухел.

Ќе потсетиме, Баерн веќе ја загуби титулата во Бундеслигата и беше елиминиран од Купот на Германија, сепак ги чека реваншот од полуфиналето во Лигата на шампионите против Реал Мадрид. Првиот натпревар заврши без победник 2:2.