Во израелските политички проценки, прашањето повеќе не е дали борбите ќе продолжат, туку кога и на кој фронт ќе избувне следната рунда.

Имено како што пишува балканскиот сервис на Ал Џезира, експертот за надворешна политика Трита Парси вели дека Иран се обидува да го деескалира конфликтот со САД, но Израел не сака борбите да престанат.

На 23 јуни, Иран испали ракети врз катарската воздухопловна база што ја користат американските трупи – напад што беше остро осуден од Министерството за надворешни работи на Катар.

„Ќе има постојан, немилосрден притисок врз Трамп да се врати во таа војна“, изјави Парси за Ал Џезира.

Претходно, во истиот контекст, израелскиот весник „Маарив“ се осврна на политичките и безбедносните проценки кои укажуваат дека неодамна постигнатото примирје меѓу Израел и Иран, со американско посредништво, не го завршило конфликтот меѓу двете страни, туку го означило почетокот на нова, уште поопасна фаза.

Не е прашање дали, туку кога борбите ќе продолжат

Ана Браски, политички дописник за весникот „Маарив“, ги пренесува израелските политички проценки според кои прашањето повеќе не е „дали борбите ќе продолжат“, туку „кога и на кој фронт ќе избувне следната рунда“.

И покрај релативната смиреност, Израел сè уште го смета запирањето на нуклеарната програма на Иран за „врховна национална цел“, додека Иран одбива да се откаже од својата нуклеарна програма. Браски тврди дека актерите не се промениле и дека „играта продолжува“, без илузии дека конфликтот е завршен.

Таквиот став се темели на изјавата на шефот на Мосад, Дејвид Барни, кој, по стапувањето во сила на прекинот на огнот, рече: „Ќе продолжиме внимателно да ги следиме сите проекти во Иран, кои ги знаеме многу детално. Ќе бидеме таму како што бевме и досега“.

Израелските набљудувачи ја толкуваат оваа изјава како навестување дека затишјето е само привремено.