Хрватскиот парламент дебатира за предлогот на пратеничката Марија Селак Распудиќ за вклучување на периодот на работа за време на редовното студирање како дел од работното искуство.

Оваа иницијатива има за цел да ја исправи, како што наведува таа, неправдата кон младите луѓе кои, иако работат и плаќаат придонеси за време на студиите, подоцна немаат доволно работно искуство за старосна пензија- пишува Каматица..

Селак Распудиќ истакнува дека студентите денес активно работат во различни сектори, од трговија и угостителство до ИТ, со што придонесуваат за економијата. Сепак, нивните напори остануваат „невидливи“ во пензискиот систем, што ги демотивира младите луѓе и создава нееднаквост во однос на оние кои почнуваат да работат веднаш по завршувањето на средното образование.

Иако идејата изгледа привлечно, прашањето за финансиската одржливост на пензискиот систем се наѕира како голема пречка. Хрватскиот пензиски систем е веќе под голем притисок, а секоја нова придобивка претставува дополнителен товар за буџетот. Економскиот аналитичар Дамир Новотни забележува дека признавањето на студентската работа како пракса не е вообичаена практика во светот и не може да се воведе автоматски.

Воведувањето на оваа мерка би можело да има значителни последици врз пазарот на трудот. Работодавците често вработуваат студенти затоа што е поевтино и пофлексибилно. Доколку работата преку студентски договори се изедначи со редовно вработување, работодавците би можеле да го намалат својот интерес за вработување студенти.

Од друга страна, поддржувачите на оваа мерка тврдат дека тоа би ги намалило злоупотребите, бидејќи работодавците често користат студентски договори за работни места кои треба да бидат регулирани со стандардни договори за вработување. Иако предлогот штотуку ја отвори дебатата, јасно е дека секоја реформа на пензискиот систем е чувствително прашање кое бара долгорочни пресметки и пошироки договори.