Цената на природниот гас во Европа значително варира. Најевтин е во Романија и Хрватска, а најскап во Португалија и Италија, според податоците на Евростат, објавува Профит.ро, пренесува Политика.рс. Цената на природниот гас се зголеми во втората половина од 2024 година. За разлика од критичната 2022 година, кога започна конфликтот во Украина, главната причина сега е различна.

„Зголемувањето главно се должи на фактот дека даноците се вратија на нивното вообичаено ниво во многу земји од ЕУ, откако беше укинато ослободувањето од данок поради енергетската криза“, соопшти Евростат.

Разликите во цените во Европа се навистина огромни. На пример, за 100 киловат-часови во Шведска плаќате 18,93 евра, во Холандија – 16,71, во Романија – 5,41, во Хрватска – 4,56, во Турција – 2,13… Секако, кога станува збор за цените, секогаш мора да се земе предвид куповната моќ. Општо земено, во рамките на ЕУ, природниот гас е најевтин во Романија и Хрватска.

Ова се две земји-членки кои успеаја да ја намалат својата зависност од Русија, а во исто време да одржат ниски цени благодарение на нивните енергетски стратегии. Романија е една од енергетски најнезависните земји во ЕУ и планира да стане целосно автономна во однос на природниот гас. Клучен во овој поглед е проектот „Нептун Дип“ во Црното Море, за кој се очекува да биде оперативен до 2027 година и да го удвои производството на природен гас на Романија. Хрватска го отвори својот главен терминал за течен природен гас на островот Крк во 2021 година.

И планира да ги зголеми испораките за 82 проценти во текот на следните три години, според Националниот комитет за нафта на Србија. Во моментов, околу 19 проценти од гасот што се користи во Европа сè уште доаѓа од Русија, преку гасоводот Турски тек и испораките на течен природен гас. Душан Бајатовиќ, извршен директор на „Србијагас“, рече дека американските инвеститори би можеле да го купат гасоводот „Северен тек“ под Балтичкото Море, кој беше сериозно оштетен во експлозиите во 2022 година и оттогаш нема проток на гас таму.