Во геополитички контекст кој постојано се менува, одлуката на Германија и нејзините западни сојузници да ги укинат ограничувањата за употреба на ракети со долг дострел против цели на руска територија претставува пресвртница во овој момент од војната во Украина.

Овој потег доаѓа како одговор на интензивираните руски воздушни напади врз Киев и други украински региони, кои последниве денови предизвикаа нов бран загриженост за цивилната безбедност и стратегиската рамнотежа во конфликтот.

Со дозволата за користење на западно оружје – конкретно германските ракети „таурус“ – (Taurus) – Украина за првпат добива политичка и воена поддршка за директни удари длабоко во руската територија. Оваа одлука не само што го менува оперативниот капацитет на украинските сили, туку и ја редефинира позицијата на Европа во конфликтот од одбранбена логика кон потенцијална поддршка за проактивна стратегија.

Прашањето што сега се отвора е: дали ова е одлучен чекор кон запирање на руската агресија, или ризичен потег што може да ја ескалира војната на ново ниво?

Имено, како што пишува американски „Си-ен-ен“ на оваа тема рускиот претседател Владимир Путин сега се соочува со меѓународен притисок да прифати договор за прекин на огнот, вклучително и од американскиот претседател Доналд Трамп, кој е сè повеќе фрустриран од бавниот напредок.

„Веќе нема никакви ограничувања на дострелот за оружјето доставено до Украина“, рече германскиот канцелар Фридрих Мерц на европскиот форум во Берлин во понеделник. „Ниту од Британците, ниту од Французите, ниту од нас. Ниту од Американците.“

„Со други зборови, Украина сега може да се одбрани и со напаѓање на воени позиции во Русија, на пример“, додаде тој.

Според досегашните информации, крстосувачки ракети од типот „таурус“ не се испорачани, пишува германски Дојче Веле.

Крстосувачката ракета „таурус“, технолошко најнапредното оружје на Германија

Крстосувачката ракета „таурус“ (Taurus KEPD 350), произведена од германско-шведската компанија Таурус системс (Taurus Systems GmbH), претставува едно од технолошки најнапредните оружја што досега ѝ било понудено на Украина од страна на Западот. Оваа ракета е специјално дизајнирана за прецизни удари врз силно заштитени и стратешки цели како што се мостови, командни центри и подземни бункери. Она што навистина го издвојува „таурус“ од останатите слични системи, како британската „шедоу сторм“ (Storm Shadow) или француската „скалп“ (Scalp-EG), е нејзината интелигентна боева глава со системот „мепсихо“ – (Mephisto).

За разлика од конвенционалните ракети, „мепсихо“ овозможува програмирање на детонацијата на точно одредена длабочина во структурата на целта. Ракетата може да продре низ неколку слоеви материјал пред да експлодира, што обезбедува максимално уништување на цврсто изградени цели – нешто што е особено важно кога се цели критична инфраструктура, како на пример Кримскиот мост, кој веќе бил дискутиран како можна цел во откриен разговор на германски офицери.

„Таурус“ е опремен со турбофан мотор, кој овозможува подобар дострел и поекономично управување со горивото, во споредба со турбомлазен мотор кај „сторм шедоу“. Со оваа конфигурација, се проценува дека „таурус“ може да погоди цели и до 250 километри подалеку од британско-француските конкуренти, достигнувајќи максимален дострел до 500 километри.

Покрај тоа, ракетата користи технологија за радарска незабележливост и може да лета на височини од само 50 метри, што значително ја намалува можноста за откривање од страна на противничките ПВО системи. Овие способности го прават „таурус“ особено ефикасно оружје за пробивање на стратешки заштитени објекти во внатрешноста на руската територија.

Со добивањето на овие ракети, Украина не само што го зголемува својот домет, туку и својата способност за прецизни и разорни удари врз цели кои досега беа надвор од дофат. Овој систем, според многу аналитичари, би можел да претставува пресвртница во динамиката на конфликтот, особено доколку биде употребен на начини што ќе ја наруши руската логистика и командна структура.

СПД: Нема промена на курсот за испорака на оружје

Вицеканцеларот Ларс Клингбејл од редовите на социјалдемократите (СПД), сепак тврди дека нема промена на курсот.

„Во однос на обемот, би сакал да кажам дека нема нов договор што го надминува она што го направи претходната влада“, рече тој.

Поранешниот канцелар Олаф Шолц (СПД) секогаш се залагаше за ограничување на опсегот на испорачаното оружје.

„Индивидуалните исклучоци од тоа имаат смисла, но генерално мислам дека сè што ја проширува војната е погрешно“, вели политичарот од СПД, Ралф Штегнер. Тој оценува дека изјавите како оние на Мерц „не се од помош“.

Изјавите на канцеларот наидоа на различни реакции кај германските политичари. Пратеничката на Зелените, Агњешка Бругер го поздрави тоа како „логично и одамна задоцнето“. Таа побара сега да ѝ бидат доставени на Украина крстосувачките ракети „таурус“.

Шефот на парламентарната група Левица, Серен Пелман, ја осуди руската агресивна војна, но исто така изрази загриженост: „Испораката на сè поголемо и потешко оружје не стави крај на војната“. Фактот дека сега веќе нема ограничување на опсегот на испорачаното оружје може, смета тој, „да доведе до понатамошна ескалација“.

Либералната европратеничка (ФДП) Мари-Агнес Штрак Цимерман ја сподели објавата на Мерк на Х за ограничувањето на опсегот и напиша: „Многу сум му благодарна на канцеларот за оваа долгоочекувана одлука“.

Од друга страна шефот на БСВ, Сара Вагенкнехт, критикува и оценува дека тоа „на крајот може да доведе до војна во Германија“.

Кремљ одговара со критики

Одлуката на Германија да дозволи користење на ракети со долг дострел ја означува новата фаза во западната поддршка за Украина од дефанзива кон ограничена офанзива, анализираат светските медиуми.

Реакцијата на Кремљ со остри критики, додека истовремено ја засилува својата офанзива со дронови, ја покажува контрадикторноста на руската реторика за дијалог. Во овој контекст, „таурус“ станува повеќе од оружје  и е сигнал дека трпението на Западот се истрошува, а војната влегува во покомплексна и потенцијално поризична етапа.