Претседателот на Собранието на Србија, Ивица Дачиќ, денес изјави дека главниот заклучок на дводневниот меѓупартиски дијалог на власта со опозициските партии кои ги бојкотираа изборите, со посредство на претставниците на Европскиот парламент (ЕП), е да се подготви предлог мерки и решенија за кои учесниците треба да одлучат до 1 септември.

Дачиќ ги повика актерите во дијалогот да ги испратат своите барања до 1 август, за да бидат вклучени во предлогот на мерки и решенија.

-За успехот на дијалогот е важно барањата на опозицијата да бидат реални, остварливи и одржливи, така што некому да не му се дава алиби да не излезе на избори и со тоа да ја оцрни Србија, кажа Дачиќ во Белград на заедничката прес-конференција со претставниците на ЕП.

Тој изјави дека вчерашните и денешните разговори им послужија на актерите да ги искажат своите ставови за очекувањата од дијалогот, како и да се разменат мислења за прашања поврзани со медиумите.

Дачиќ најави дека следната рунда дијалог ќе се одржи на 17 и 18 септември.