Д-р Ненад Лазаров повика да се лоцира одговорноста за катастрофалниот пожар во модуларната ковид-болница во Тетово, во кој загинаа 14 луѓе.

„Обединете се и самоказнете се, 14 луѓе живи изгореа и не може да нема одговорни! Не забораваме! Сите што молчите може и вас да ве снајде,“ напиша Лазаров на Фејсбук.

Во пожарот на 8 септември изгоре целиот модуларен ковид-центар во тетовската Клиничка болница, а покрај загинатите, имаше и 12 повредени.

Првичната истрага на Обвинителството покажа дека пожарот избил од неисправен продолжен кабел на кој бил приклучен дефибрилатор. Неколку дена по трагедијата, изгорената болница ја истражуваа и независни германски експерти, кои допрва треба да ги презентираат наодите.

Министерот за здравство Венко Филипче и неговиот заменик Илир Хасани по пожарот понудија оставки, а премиерот Зоран Заев по неколку недели соопшти дека не ги прифаќа, затоа што не гледа директна одговорност за пожарот кај нив.