Црногорското обвинителство денес започна истрага откако црногорскиот претседател Јаков Милатовиќ објави дека вицепремиерот и министер за економски развој Ник Ѓељошај му испратил заканувачки и несоодветни пораки во телефонска преписка синоќа.

Кабинетот на Милатовиќ доцна во ноќта објави дека вицепремиерот и лидер на Албанската алтернатива Ник Ѓељошај му испратил на претседателот низа закани и несоодветни пораки, веднаш откако беше објавено дека Милатовиќ го искористил своето уставно право и одбил да го потпише Законот за данок на недвижен имот, кој претходно беше усвоен од црногорскиот парламент.

Со тоа, Милатовиќ го врати законот во парламентот на повторно разгледување. Кабинетот на Милатовиќ, исто така, го повика премиерот Милојко Спајиќ веднаш да го разреши Ѓељошај, а за сè беше известен и директорот на Управата на црногорската полиција.

Ѓељошај одговори на тие обвинувања со соопштение за медиумите во кое тврди дека Милатовиќ не го потпишал законот од лични интереси и интересите на неговите пријатели и тврди дека не му се заканил на претседателот на Црна Гора.

Милатовиќ одговори со објава на мрежата Икс, приложувајќи СМС-преписка помеѓу претседателот на Црна Гора и потпретседателот на црногорската влада.

Neću posustati ni pred kakvim pritiscima kada je Ustav, poštovanje zakona i interes građana i države u pitanju.

Pa ni kada je u pitanju neprihvatljivo ponašanje potpredsjednika Vlade Crne Gore.

Ovo nije politika, ovo je pitanje dostojanstva institucija, pravne sigurnosti i… pic.twitter.com/d3AHPisJ90

— Jakov Milatovic 🇲🇪🇪🇺 (@JakovMilatovic) August 1, 2025

„Не требаше да се впуштате во ова и да очекувате реакција на Албанците од сите нивоа и каде и да имаме влијание… Но, ќе го добиете одговорот што го заслужувате“, напиша Ѓелошај.

Црногорскиот претседател Јаков Милатовиќ веќе неколку пати го искористи своето право да не ги потпишува законите претходно усвоени од претставниците и да ги врати на повторно одлучување. Откако парламентот ќе го усвои истиот закон по втор пат, Милатовиќ е должен да го потпише законот.

Претседателот на Црна Гора често ги критикува одлуките на црногорската влада и премиерот Милојко Спајиќ. Милатовиќ и Спајиќ беа партиски колеги и основачи на Движењето „Европа сега“ (ПЕС), владејачката партија во Црна Гора. Сепак, по политичко несогласување, Милатовиќ ја напушти партијата со дел од нејзиното членство.

Ник Ѓељошај пак е лидер на десничарската Албанска алтернатива, која заедно со ПЕС на Спајиќ, просрпската десница, Бошњачката партија и Демократска Црна Гора го сочинуваат црногорското владејачко мнозинство. Тој беше претседател на Општина Тузи, која е претежно населена со албанско и бошњачко население. Усвојувањето на Законот за данок на недвижен имот, кој Милатовиќ го врати во парламентот синоќа, најмногу би му користело на буџетот на Општина Тузи.

Милатовиќ во своето образложение наведе дека го вратил законот бидејќи, како што тврди, го прекршил Уставот, правната несигурност и можноста 22.000 земјоделци да ги изгубат даночните олеснувања.