Центарот за истражување на национализмот и културата (ЦИНИК) ја објави публикацијата „Архиви на невидливите: Жените од македонското минато во печатот помеѓу двете светски војни“, која содржи авторски текстови и систематизирана библиографија за појавноста и видливоста на жените во печатените медиуми од меѓувоениот период.

Публикацијата ја изготви тим од осум истражувач(к)и, и тоа Нада Бошковска (стручна соработничка/ предговор), Здравко Стојкоски (историски контекст), Ивана Хаџиевска (аспекти од историјата на жените во истражуваниот печат), Мања Величковска и Фросина Крушкаровска (книжевни аспекти), Марина Мијаковска (составувачка на библиографијата), Јана Коцевска (составувачка на регистар на женски имиња) и Билјана Котевска (прирачник со препораки за крос-институционални политики). Уреднички на публикацијата се Ивана Хаџиевска и Јана Коцевска од ЦИНИК – Скопје.

Промоцијата на публикацијата беше проследена со конференција на тема: „Регионални искуства на архивирање и изучување на историјата на жените во печатената култура – патишта на зачувување и споделување“, на која учествуваа Нада Бошковска – професорка на Универзитетот во Цирих, Ана Колариќ од Универзитетот во Белград, Ивана Пантелиќ од Институтот за современа историја во Белград и Манца Г. Ренко од Универзитетот во Љубљана.

Во текот на промоцијата беше поставена и изложбата „Музеј на женски приказни“ на визуелната уметница Христина Иваноска.

(Текстот е објавен во „Културен печат“ број 104, во печатеното издание на весникот „Слободен печат“ на 6-7 ноември 2021)