Централната разузнавачка агенција (ЦИА) се бори да регрутира странски информатори и „и требаат повеќе шпиони“, објави „Вашингтон пост“, повикувајќи се на сегашни и поранешни разузнавачки службеници.

Главни проблеми што ги наведуваат изворите се глобалната експанзија на системите за јавен надзор и напредокот во препознавањето на лицата, што им отежнува на оперативците да избегнат откривање.

Заменик-директорот на ЦИА, Мајкл Елис, го призна проблемот во неодамнешно интервју, велејќи дека иако „некои од алатките и техниките од 1960-тите или 70-тите можеби сè уште функционираат денес, многу од нив треба да се ажурираат и освежат“.

Други претставници посочија на минатите неуспеси, вклучително и агресивното регрутирање кинески службеници од страна на агенцијата во раните 2000-ти. Безбедносните сили на Пекинг подоцна се справија со таа мрежа, наводно апсејќи и егзекутирајќи до дваесетина вработени на ЦИА, објави весникот.

Пандемијата на коронавирус, исто така, ги попречи операциите со прекинување на средбите лице в лице со информаторите поради блокади и ограничувања за патување.

Актуелниот план на американскиот претседател Доналд Трамп за затворање на 10 амбасади и 17 конзулати како дел од буџетските намалувања, исто така, се заканува дополнително да го намали глобалното влијание на ЦИА.

Во обид да привлече дезертери, ЦИА продуцираше видеа што во извештаите се опишани како видеа со „холивудски квалитет“ насочени кон руската и кинеската публика, кои беа дистрибуирани преку социјалните медиуми.