Ве уверам дека денеска нема да има напад. Нема да има ескалација ниту во наредната недела, ниту во неделата потоа, ниту во наредниот месец. Војните во Европа ретко почнуваат во среда, изјави рускиот амбасадор во Европската Унија, Владимир Чижов, отфрлајќи ги тврдењата дека Русија ќе почне инвазија врз Украина денеска.

Навистина, војните во Европа, барем поголемите конфликти во изминатиот век, не почнале во среда, како што забележа рускиот амбасадор Чижов. Исклучок, на кој можеби индиректно посочува рускиот дипломат со забелешката „ретко“, е еден единствен конфликт – на 24 март 1999 година, среда, НАТО го почна бомбардирањето на Сојузна Република Југославија со цел да ги спречи силите под команда на тогашниот претседател Слободан Милошевиќ да извршат геноцид на Косово.

Ниту една друга голема војна во Европа не почнала во среда. Првата светска војна во 1914 година почнала во понеделник, а Втората светска војна во 1939 година почнала во петок.

Таков случај нема ни меѓу низата судири во кои директно или индиректно била вклучена Русија по распаѓањето на Советскиот Сојуз. Војната во Украина помеѓу владините сили и проруските бунтовници во 2014 година почна во четврток, а народниот бунт Еуромајдан во Киев во 2013 година почна во четврток. Првата чеченска војна во 1994 година почна во недела, Втората чеченска војна во 1999 година во четврток, а руската интервенција врз Грузија во 2008 година почна во петок.

Ни на Балканот ниту една војна не почнала во среда. Првата балканска војна (1912) почнала во вторник, Втората (1913) во недела, Војната во Југославија во 1991 година почна во недела, а Војната на Косово во 1998 година во сабота. Дури и Илинденското востание во 1903 година не почнало во среда, туку во недела.

Среда, сепак, бил ден на големи настани што ја промениле историјата на светот. Во среда почнале Октомвриската револуција во Русија во 1917 година и Граѓанската војна во САД во 1775 година.