Одговорност за судиите кои не работат според Законите и Уставот, туку за свои лични интереси за некаква корист и максимална поддршка за судиите кои работат чесно, најави новиот претседател на Судскиот совет, Александар Камбовски кој едногласно беше избран на денешната седница како единствен предлог.

-Мислам дека е крајно време да ги тргнеме од нашите редови тие 10, 15, 20 судии од вкупно 400 судии во Македонија. Секој судија кој не работи според Законите, туку според некои негови лични интереси, дали потпаднал под влијание, дали сакал да оствари некаква друга материјална или нематеријална корист, бидете уверени дека местото нема да му биде веќе во судскиот систем. И обратно, сакам да нагласам, сите други судии кои работат чесно, а тоа се огромно мнозинство, ќе имаат максимална поддршка од Судскиот совет. Вратите и телефонските линии ќе им бидат отворени 24 часа. Каков било притисок ако имаат,  какво било влијание ако имаат, ако некој се обидува да им прави, слободно да се обратат за заштита пред Судскиот совет – рече Камбовски.

Тој не одговори конкретно дали се води некаква нова постапка за одговорност за судијата Енвер Беџети кој се најде на „црната листа“ на Стејт департментот заедно со поранешниот вицепремиер, Артан Груби со образложение дека зел мито за да го застари случајот за масовното прислушување, со образложение дека овие постапки се тајни.

– Постапките се тајни според Законот, не можам за лицето да споделувам детали – рече Камбовски.

Еден од првите предизвици со кои ќе треба да се соочи Камбовски како претседател на ова тело, се најавите на власта за разрешување на членовите кои се избрани во Собрание, меѓу кои и поранешната претседателка Весна Дамева. Порача дека се надева дека Собранието ќе постапува согласно Уставот и законите.

– Во принцип Судскиот совет не сака да коментира изјави на поединечни политичари, меѓутоа длабоко сме уверени дека Собранието како уставотворец, законодавец, ќе ги почитува и Уставот и законите и ќе постапува согласно нив и аналогно на тоа и одлуките кои ќе ги носи – рече Камбовски.

Ја повика на соработка извршната власт со оглед на тоа што трите власти, извршната, судската и законодавната власт се тесно поврзани и мора и да соработуваат и да се контролираат.

-Апсолутно треба да имаме соработка и со извршната и со законодавната власт. Ние сме дел од системот на владеење на оваа држава, нели трите власти, ние мора меѓу нас и да се помагаме и да се контролираме. Таа е и смислата, затоа и Уставот е направен на тој начин. Тоа во светот функционира перфектно, може е тежок збор перфектно, но функционира. Kај нас некако тешко се воспоставува тој „чек енд баланс“ меѓу тие власти, меѓутоа се надеваме дека ќе успееме да постигнеме некој повисок стандард на соработување. Треба да соработуваме. Не тоа да се сфаќа како мешање на извршната во судската или обратно. Бидејќи буџетот ни е заеднички, на државата. Мора да се обраќаме за финансиски средства, потреби кои ги имаме, од друга страна владата да се обрати до нас за проблем кој го има стопанството, во смисла бавно течење на стопанските постапки, па да видиме што може да направиме за тие побрзо да се завршуваат. Сите тие работи мора да се решаваат во дослух меѓу судската, извршната и законодавната власт – порача тој.

Една од главните негови пораки беше до судиите, на кои им порача дека Судскиот совет е нивна куќа, „куќа на судиите“, дека покрај тоа што ги контролираат, ова тело треба да го чувствуваат како нивен дом.

Камбовски го предложи поранешниот врховен судија, Исамедин Лимани, а јавна поддршка доби и од членовите, Антоанета Димовска, Ивица Николовски, Тања Чачаровска Илиева и Дамева.

– Александар Камбовски има и интегритет и кредибилитет да се бори за поголема финансиска независност на судовите, бидејќи тие ја вршат судската власт, а Судскиот совет треба да им обезбеди услови, како и за судиите да можат понезависно и непристрасно да го применуваат правото – изјави Лимани.

Димовска рече дека не се сомнева дека ќе покаже менаџерски способности и дека нема никаква причина да не го даде својот глас.

– Гласот е глас, тој ќе биде прв меѓу еднаквите, ќе нè организира, меѓутоа останува да ги вкрстуваме аргументите и да дискутираме понатака за секое спорно прашање – изјави Димовска.

Николовски рече дека Камбовски го познава подолг период и со задоволство ќе го поддржи неговиот избор.

– Со неговиот кредибилитет, интегритет, искуство, знаење и целосно запознаен со сите потреби и проблеми на третиот столб на нашата држава, очекувам дека заеднички ќе одиме во една позитивна насока на зацврстување и подигнување на довербата на граѓаните, но не со зборови, туку чекор по чекор со дела. Очекувам под негово водство на Судскиот совет да ја зајакнеме довербата, туку и со дела да придонесеме во едно поквалитетно правораздавање – изјави Николовски.

Тој од новиот претседател очекува да седне и да разговара со извршната власт за да ги решат проблемите во судството.

– Очекувам поголема ангажираност од колегата Камбовски во насока на зацврстување на позицијата на Судскиот совет во правосудниот систем, за реализирање на нашите заеднички заложби, а тоа е да се зачува самостојноста, угледот и независноста во судството и враќање на довербата на граѓаните – изјави Чачарова Илиевска.

Дамева рече дека за висок морал и интегритет во судството дознал во моментот кога бил избран за член на Судскиот совет, каде што од многу страни самите судии изразија огромно задоволство, потенцирајќи дека е судија што е самостоен и независен.

– И да не беше предлог на колегата Исамедин Лимани, јас ќе го предложев. Вториот момент заради кој го поддржувам овој предлог е од причина што во овој краток период додека е член јас видов исклучителна поддршка од негова страна во сите активности на Советот во насока на имплементација на препораките на Оценската мисија, и тоа е многу важно – изјави Дамева.

Камбовски беше избран за член на Судски совет минатата година од редовите на судиите, а последно бил судија во Апелациониот суд Битола, каде што бил унапреден во 2017 година.

Советот е составен од 15 члена, од кои осум члена ги избираат судиите од своите редови, петмина ги избира Собранието од кои двајца на предлог на претседателот на државата. По функција членови на Советот се претседателот на Врховниот суд и министерот за правда, кои учествуваат во работата на Советот без право на глас.

Претседателското столче во Советот остана празно откако Дамева даде неотповиклива оставка обвинувајќи ја извршната власт за притисоци и несоработка. Новиот претседател се избира еден месец по нејзината оставка, откако беше одложен до комплетирање на составот со изборот на двајца нови членови од редот на судиите.

„За“ новиот претседател гласаа и новите двајца членови на Советот, меѓу кои и Данка Ристова, сопруга на актуелниот градоначалник на Радовиш од редовите на ВМРО-ДПМНЕ.