Оваа не толку привлечна жолтеникава и проѕирна течност со киселкаст вкус до неодамна беше најзапоставениот млечен производ, или подобро речено нуспроизвод, бидејќи настанува со одвојување од млекото кое се згуснува за време на процесот на производство на сирење. Во древни времиња била ценета и фалена како еликсир, но во поновата историја најчесто се фрлала како отпад – само некои сточари знаеле или имале волја да ја користат во исхраната на младите домашни животни, пишува „Живим“.

Сепак, будењето на интересот за природна и здрава храна, во комбинација со новите истражувања, фрли ново светло врз сурутката, па таа во последните години стана многу барана како лесен напиток богат со корисни состојки и со многу малку калории – само 26 на сто грама.

Народен лек

Традиционално, сурутката се смета за природен лек кој се препорачува при хроничен замор, ослабен имунитет, проблеми со дигестивниот систем и црниот дроб, габични инфекции, висок крвен притисок, за детоксикација на организмот, но и како помош при слабеење. Благодарение на млечната киселина, сурутката го поттикнува работењето на цревата и помага во спречување на прекумерното размножување на габички и бактерии. Се препорачува при грчеви, надуеност, запек, воспаленија на цревата итн. Кај дигестивни проблеми, советот е пред секој оброк да се испие една лажица сурутка измешана во чаша вода.

Се смета дека сурутката е особено корисна за црниот дроб, бидејќи го поттикнува неговото чистење, а и аминокиселините во нејзиниот состав го поддржуваат закрепнувањето на црниот дроб при различни заболувања. Богата е со цистеин, условно есенцијална аминокиселина што човечкиот организам може да ја синтетизира, но која е неопходна за производство на глутатион – најважниот антиоксиданс во нашето тело. Покрај тоа, ја намалува нивото на шеќер во крвта и крвниот притисок, а брзо му ја враќа на организмот потребната количина вода и електролити.

Дневни дози

Повеќето луѓе можат да добијат доволно протеини од здрава и разновидна исхрана. Доколку сметате дека ви е потребна поголема доза и дека протеините од сурутката би ви помогнале, консултирајте се со лекар пред да почнете да ги консумирате. Не треба да пиете сурутка или да внесувате протеини од сурутка доколку сте алергични на млечни производи.

За позитивен ефект врз здравјето, природната сурутка треба да се пие редовно, дури и неколкупати на ден. Бидејќи има диуретичко дејство, се препорачува да се започне со помали количини и постепено да се зголеми внесот до 4,5 децилитри, поделени на три еднакви дози во текот на денот. Максималната дневна доза не треба да надмине еден литар.

Како општа дневна доза на протеини од сурутка во прав, американскиот лекар Дејвид Вилијамс препорачува 18 грама висококвалитетни протеини. Наједноставниот начин за консумирање е да се измеша протеинскиот прав со вода, сок или немасно млеко или да се додаде во овошно-зеленчуков смути.

Кога се земаат во соодветни количини, протеините од сурутка се сметаат за безбедни. Некои истражувања сугерираат дека во големи количини можат да предизвикаат дигестивни проблеми како грчеви, гадење, намален апетит, главоболка и замор, а понекогаш и појава на акни.

Исто така, постои мислење дека внесувањето нутритивно рафинирана храна, како што се протеините од сурутка, може да носи одредени ризици, бидејќи, иако содржи многу хранливи материи, таа е нутритивно неурамнотежена. Можните несакани интеракции на протеините од сурутка со храна и други суплементи сè уште се слабо истражени, но е познато дека кога се земаат заедно со алендронат (лек за остеопороза) и одредени антибиотици (кинолони и тетрациклини), можат да ја намалат апсорпцијата на лекот.