Данскиот тенисер и шестиот носител на турнирот Холгер Руне се пласираше во четвртфиналето на Ролан Гарос по четиричасовна драматична борба со Аргентинецот Франциско Серундоло.

Руне славеше со 3:2 во сетови 7:6 (7:3), 3:6, 6:4, 1:6, 7:6 (10:7) и за пласман во полуфиналето ќе се бори со Норвежанецот Каспер Руд.

Мечот Руне одлично го започна со 4:1 со брејк предност и изгледаше дека рутински ќе го добие првиот, но Серундоло брзо возврати и го анулираше заостанувањето во финишот на сетот и избори тај-брејк.

Сепак, Руне го доби тај-брејкот без поголеми проблеми за водство во сетови. Ова сепак не го скрши психолошки Аргентинецот кој во вториот сет заигра уште подобро, направи брејк во четвртиот гем и таа предност ја сочува до крајот на сетот.

Во третиот сет повторно Руне возвраќа, иако Серундоло успеа да го анулира неговиот прв брејк. На крајот на овој сет Данецот освојува уште еден гем на сервис на ривалот и доаѓа на сет до победа.

Четвриот сет помина во доминација на Серундоло кој му дозволи на Руне само еден гем, па мечот отиде во петти, одлучувачки сет. Тука следуваше вистинска драма која се одлучуваше во тај-брејк каде што Руне беше поуспешен со 10:7.