Англискиот премиерлигаш Челси се соочува со дури 74 прекршувања на правилата на Фудбалската асоцијација на Англија (ФА) во периодот кога клубот беше под водство на рускиот милијардер Роман Абрамович.

Според информациите, прекршувањата се однесуваат на трансфери, соработка со фудбалски агенти и вложувања од трети страни, и се случувале во периодот од 2009 до 2022 година.

Она што е посебно интересно е дека на нерегуларностите први укажале токму сегашните американски сопственици на клубот. Тие, при деталната анализа по преземањето на управувањето со Челси, ги откриле сомнителните активности и веднаш ја информирале ФА, со цел јасно да стават до знаење дека неправилностите се случувале пред нивното доаѓање.

Клубот има рок до 19 септември да достави официјален одговор на обвиненијата. Иако за вакви случаи може да следува и санкција во вид на одземање бодови, очекувањата се дека, поради транспарентниот пристап и соработката со истражните органи, Челси ќе се соочи само со парична казна.