Турскиот министер за надворешни работи Мевлут Чавушоглу денеска изјави дека се надева за „нова страница“ во грчко-турските односи, по соработката која ја имаа двете земји откако Турција беше погодена од смртоносниот земјотрес, пишува грчки „Катимерини“.

Шефот на турската дипломатија на средбата што ја имаше со својот израелски колега, меѓу другото истакна дека „сака стабилност и мир во регионот“.

„Очигледни се чекорите што ги презедовме за нормализирање на нашите односи со земјите од регионот, особено со Израел“, изјави Чавушоглу.

Осврнувајќи се на Грција, тој додаде: „Се надевам дека и нашата солидарност за време на овој земјотрес ќе биде одлучувачка за отворање на нова страница со Грција“.

„Затоа, како и сите земји во регионот, мора да продолжиме да работиме за стабилноста, економскиот развој и мирот на нашиот регион“, истакна тој.