За годишните одмори, туристите, но и локалното население, би можеле да изберат некои поевтини летни дестинации бидејќи инфлацијата не ги заобиколи ни сместувањето на хрватското приморје.

Во последните три години цените во просек пораснале за 30 отсто, а понекогаш и двојно повеќе. Викендичките, особено оние со базен, се исклучително популарни во последните години, меѓу кои и онаа во Задварје, која чини 400 евра дневно.

Интересот не е намален, иако цените за изнајмување растат во последните три години, пренесува РТЛ.

„Како што се зголемуваа цените на влезните параметри, така растеше и цената на изнајмувањето во мојот случај, на ниво од околу 10 проценти“, вели Јозо Радељиќ, сопственик на викендицата во Задварје.

И во Загора и на брегот, сите изнајмувачи мораа да ги прилагодат своите цени нагоре.

„Значи, минатата година, станоиздавачите веќе ги зголемија цените за 15 до 20 проценти во просек. Сепак, мораме да одиме повисоко затоа што треба да ги надоместиме сите трошоци што ни се наметнати“, вели претседателката на Хрватското здружение за семејно сместување, Барбара Марковиќ.

Студио за двајца во центарот на Сплит во 2021 година чинеше 100 евра, лани 150, а сезонава и до 170 евра.

„Мислам дека тоа ќе биде околу 30 проценти во однос на изминатите три години поскапувања“, вели Марковиќ.

Најавите за средината на сезоната се добри, но сегашните гости забележуваат дека сместувањето е скапо. „Тука сме цел месец, следна е Италија, но овде е многу поевтино отколку таму“, рече Јеонгхеон Ким од Јужна Кореја.