Царинската војна на американскиот претседател Доналд Трамп може да ја „запали“ светската економска криза, предупреди Клеменс Фист, претседател на влијателниот економски институт Ифо, пренесе Dpa.

Тарифната војна може да доведе до забрзано ширење на протекционизмот и во Кина и во Европа, изјави Фист за „Зидојче цајтунг“.

„Кога сите одат во погрешна насока, можна е голема криза“, додава тој.

Трамп го суспендираше воведувањето царини за повеќето трговски партнери на 90 дена, но затоа уште повеќе ја заостри контролата врз Пекинг. Американците сега сакаат да воведат царини за кинескиот увоз со стапка од 145 отсто, а Кина одговори со зголемување на царината за американскиот увоз на 125 отсто.

Фист оценува дека ескалацијата со Кина продолжува и дека неизвесноста е пролонгирана.

Според него, посебна закана е тоа што САД, како најголем пазар во светот, ја уништуваат својата репутација на доверлив партнер. „Каматните стапки на САД се зголемуваат, а доларот паѓа. Тоа е повик за будење“, вели тој.

Имено, две третини од берзанската капитализација се вртат околу американската берза, а доларот е сидро на глобалната валута. „Ако сето ова се измеша, последиците ќе бидат несогледливи“, нагласува економистот.

Фист оценува дека е можно Трамп да попуштил поради реакцијата на американскиот пазар на државни обврзници и дека пазарот ги покажал своите мускули да ги сигнализира границите на политиката.

„Кога владите се однесуваат непредвидливо и деструктивно, пазарот им ги одзема парите и довербата“, заклучува Фист.