Скопје заслужува сериозни културни политики, реални проекти и искрена визија за развој, а не евтини кампањски трикови и измислици за дневна употреба, порача денеска на прес-конференција кандидатката за советничка и носителка на листата на СДСМ и Коалицијата во Град Скопје, Катерина Цаневска Арсовска.

Таа го обвини кандидатот за градоначалник на Скопје од ВМРО-ДПМНЕ, Орце Ѓорѓиевски, за „лажни ветувања и манипулации“, нагласувајќи дека најновиот негов настап – за наводно преместување на светскиот фестивал „EXIT“ во Скопје – бил демантиран од самите организатори.

„ЕГЗИТ“ контра Ѓорѓиевски: Не го селиме фестивалот во Скопје

– Откако фантазираше за воз по кејот на Вардар и невозможен парк во Вардариште, сега ја кажа најновата лага, дека светскиот фестивал „EXIT“ ќе се сели во Скопје, ама само ако тој победи – изјави Цаневска Арсовска.

Според неа, лагата е „прво оружје на оние кои немаат визија, план и капацитет да испорачаат решенија“. Таа порача дека граѓаните на Скопје заслужуваат чесен однос и решенија за реалните проблеми, а не манипулации.

– Градот не е играчка, туку дом на луѓе кои очекуваат вистински решенија. СДСМ го повикува Ѓорѓиевски веднаш да престане со лагите – додаде Цаневска Арсовска.

Ѓорѓиевски: „Егзит“ доаѓа во Скопје