„Бушавата азбука“ доби мурал. Во чест на 40 години од првото емитување на култната детска серија, утре во 10.30 часот во Дебар Маало ќе биде откриен мурал посветен на овој вечен симбол на македонската детска култура. Со овој настан почнува прославата на јубилејот и најавата на нови содржини за најмладите.

-Tоа е повеќе од емисија, тоа е некое културно наследство и тоа може да се обновува и да се појавува повторно и повторно. И, практично, луѓето го паметат таа генерација што као деца гледале, сега пораснаа, сега станаа родители и гледаат некои можности во тоа да ги образуваат или да ги забавуваат своите деца. Јас со Бушава азбука остарев практически, 40 години, тоа е озбилна старост за нешто на телевизија и не е така свежа и не е така модерна како што беше кога се појави – вели Слободан Унковски, режисерот на „Бушава азбука“.

Преку прославата, организаторите потсетуваат на важноста од негување, чување и унапредување на мајчиниот јазик, како и создавање квалитетна образовно-забавна програма за новите генерации.

На настанот ќе се одржи и премиера на шпицата за новата анимирана серија „Буквождер“, кое е анимираното продолжение на „Бушава азбука“.

-„Буквождер“ е едно премагнување од еден мост, меѓу тоа што било и тоа што треба да биде, и тоа е практично еден друг аспект на буквите, на употребата на јазикот и така натаму. Се радувам дека се појавува. Меѓутоа, мислам дека правото продложување на „Бушава азбука“ ќе биде кога ќе се направи „Бушав буквар“, вториот дел, што е веќе напишан од Горан Стефановски и од Маријан Алчевски. И очекувам еден ден да се развие една свест дека е тоа неопходно за да си го сочуваме јазикот и да го унапредиме -вели режисерот Унковски.

Што следува на настанот

· Премиера на шпицата за новата анимирана серија „Буквождер“

· Забавно-образовни активности за деца и музички сет на Диџеј Vishko за возрасни

· Претставување на првите лиценцирани производи под брендот „Бушава азбука“

· Кампањата „Време е за Бушавата азбука“ — со донација граѓаните стануваат сопственици на дел од производите

Време и место

· Недела, 31 август 2025

· 10.30–13.00 часот

· Дебар Маало, Скопје · Мапа: Google Maps

Агенда (кратко)

· 10:30 — Најава на јубилејот и проектите

· 10:45 — Премиера на најавната шпица за „Буквождер“ и презентација на кампањата за донации

· 11:20–13:00 — Креативни активности и подароци за деца · Музички сет на Диџеј Vishko

Настанот го организира Види вака раскажувачко студио, а изработката на муралот е поддржана од Општина Центар. Влезот е бесплатен.