Жозе Мурињо во последниот период често пати го привлекуваше вниманието поради критиките за судењето во Турција, а веројатно поради неговите реакции Фудбалскиот сојуз на оваа земја се одлучи вчерашното дерби да го суди странски судија.

Изборот падна на словенечкиот арбитар Славко Винчиќ, а на крајот средбата заврши без погодоци. По натпреварот Мурињо откри дека влегол во соблекувалната на Винчиќ по натпреварот и му честитал за добро завршената работа.

Но, сега реакции има од таборот на Галатасарај. Имено од клубот најавија дека ќе го тужат Мурињо поради расизам.

„Денеска неговиот дискурс ескалираше. Официјално можеме да објавиме дека ќе поднесеме кривична тужба во врска со расистички изјави на Жозе Мурињо и ќе поднесеме извештај до ФИФА и УЕФА“, стои во соопштението.

Причина за ваквата реакција на Галатасарај е изјавата на Мурињо во која го критикуваше однесувањето на клупата на Галатасарај велејќи дека „скокаат како мајмуни“.