Големо количество од радиоактивниот изотоп америциум е откриено при специјална акција на бугарската Национална агенција за безбедност (ДАНС), МВР и Обвинителството, објавија бугарските медиуми.

Америциум е вид на изотоп кој се чува и транспортира под посебни услови поради неговото јонизирачко зрачење. Металот е исклучително скап и вчера попладне бил откриен и одземен од куќа во Карлово. Во акцијата на агентите од Националната агенција за безбедност и на специјалните единици од бугарското МВР им помагале и пожарникари со специјална опрема.

Куќата во која е пронајден опасниот метал се наоѓа буквално во дворот на полициската станица во Карлово. Имотот е во сопственост на тројца браќа и една сестра кои се занимаваат со сточарство, чии фарми се во блиското карловско село Васил Левски.

Повеќе детали за откриената радиоактивна супстанција ќе бидат соопштени на брифинг попладнево, на кој се очекува да присуствуваат и в.д. министерот за внатрешни работи на Бугарија, Атанас Илков, претседателот на ДАНС Петар Тончев и окружната обвинителка Вања Христева.