Бугарските граѓани чекаат најмалку два месеци за да најдат мајстор кој ќе им поправи или изгради покрив. Ова за „Телеграф.бг“ го изјави експертот Христо Николов, кој со бригада работи и поправа во Југозападна Бугарија. Објектите кои во моментов се градат се побарани веќе во август, појасни Николов. Тој додаде дека за итни поправки секогаш ќе има специјалисти кои ќе можат да ве вклопат во распоредот за една недела. Има многу случаи во кои, за да не изгубат нов клиент, работниците прават увид и понуда за локацијата, земаат депозит, но ја започнуваат вистинската работа месец или два подоцна.

Таков е примерот на Ива Николова од Софија, која во јуни дошла од странство да го поправа покривот на куќата, дала капар, но занаетчиите дури во септември дошле да работат.

Во областа на градежништвото има и голем недостиг од работници, бидејќи голем дел од искусните заминале на работа во странство, каде што платите се двојно поголеми. Покрај специјалисти за покриви, недостигаат и луѓе кои вршат внатрешни поправки.

Најевтините услуги се од 70-80 лева за метар квадратен и достигнуваат 100 лева. Инаку, поправката на покривите во Варна е поле на дејствување на многу измамници. Најчесто фиктивните градежни екипи нудат ниски цени преку понуди залепени на вратите од влезовите на зградите, како и на бесплатни огласи на Интернет. Многу од нив ги посетуваат и малите населби во областа.

Во последните години случаите зачестиле, известија од полицијата во Варна.

Најчесто жртви на овој вид измами се претежно постари лица над 70 години.