Бугарскиот експремиер и пратеник Кирил Петков денес ќе поднесе оставка од пратеничката функцијата во Народното собрание. Во среда, Петков објави дека ќе се повлече од функцијата пратеник во парламентот и копретседател на партијата Продолжуваме со промените (ПП).

Оставката дојде по скандалот со општинските градоначалници и советници, кои ја напуштија формацијата поради обвинувања против раководството за притисок за склучување договори за јавни набавки со одредени компании, последователното апсење на заменик-градоначалникот Никола Барбутов и објавувањето во јавноста на аудио-снимка од разговорот помеѓу Барбутов и градоначалникот на Љулин Георги Тодоров.

„Продолжуваме со промените“ свикува изборно Генерално собрание на 27 и 28 септември за да ги избере своите управни органи. До 27 септември, Асен Василев останува единствен лидер на формацијата која дејствува како опозиција во бугарското собрание.

Кирил Петков изјавил дека не сака повторно да биде избран за лидер, објави и Василев. Тој нагласи дека обвинувањата против партијата ПП се неосновани, бидејќи не следеле никакви назначувања. Лена Бориславова, чие име се споменува и во спорната снимка меѓу Барбутов и Тодоров, изјавила дека на никаков начин не била вклучена во такви разговори или шеми и не вршела притисок врз никого.